Россия кыргызларга акчалата һәм ягулыклата булышачак

Россия Кыргызстанга гуманитар ярдәм күрсәтергә ниятли. Ярдәм акчалата һәм ягулыклата булачак.

Вице-премьер Игорь Сечин сүзләренчә, Россиядәге нефть компанияләре күршеләргә 20 мең тонна тирәсе дизель ягулык җибәрергә әзер. Әлеге ягулык гуманитар йөк булганлыктан, чик түләүләреннән дә азат ителәчәк. Аны Кыргызстанга җибәрү буенча проблемалар булырга тиеш түгел, дип искәртте вице-премьер.

Шулай ук Россия Казахстан белән берлектә кыргызларга акчалата ярдәм дә күрсәтергә уйлап тора. Финанс министры Алексей Кудрин әйтүенчә, әлеге ярдәм 10 миллион доллар тирәсе булыр, дип көтелә. «Хәзер без Казахстан һәм Евразия үсеш банкы белән берлектә Кыргызстанга нәрсәләр кирәк икәнен ачыклыйбыз. Акча иң кирәкле өлкәләрдә тотылырга тиеш. Болар - социал өлкә һәм эчке сәясәт. Иң беренче чиратта, илдә тотрыклылык булдырырга кирәк», - дип белдерде Курдин.

Бу акчалар халыкара эшчәнлеккә тотылырга тиешле резервтан алыначак. Кудрин әлеге ярдәм федераль бюджетка төзәтүләр кертүне таләп итмәячәк, дип вәгъдә итә.