Бесландагы мәчет тиздән ишекләрен ачачак

Төньяк Осетия-Алания Республикасы Диния Нәзарәте мөфтие урынбасары Хаҗиморат хаҗи Гацалов «Ансар.Ru» порталына хәбәр иткәнчә, тиздән Беслан шәһәрендәге мәчетне төзекләндерү эшләре тәмамланачак. Иман йортын ачу тантанасы июль ахыры – август башында булыр, дип планлаштырыла.

Бер катлы таш мәчет Тулатово бистәсендә (хәзерге Беслан шәһәре) 1907 елда ук төзелгән була. 1847 елдан башлап исә ул урында агач мәчет була. Әмма Совет чорында мәчет үз функцияләрен башкарудан туктый. Озак еллар биредә сөт заводы эшли, ә соңгы 10 елда бина бөтенләй ташландык килеш тора.
Төньяк Осетия мөселманнары мәчетне төзекләндерү теләген белдерә. Бу теләк җитәкчелек тарафыннан да хуплана. Мәчетне төзекләндерүгә үзеннән зур өлешне Бесланның Правобережный районы башлыгы Рулсан Дауров кертә.

Мәчет бинасында инде бөтен кирәкле коммуникацияләр кертелгән, пластик тәрәзәләр куелган. Эчке төзекләндерү эшләре дә тиздән тәмамланачак. Мөфти урынбасары әйтүенчә, мәчет өчен келәмнәр һәм люстраларга заказ бирелгән.

Яңартылган мәчетнең сыйдырышлылыгы – 300 кеше. Төп бинадан тыш, мәчет ишегалдында тәһарәтханә булачак, дип хәбәр итә «Ансар.ру» сайты.