Казанда да картлар йорты ачылачак

Казанның Дәрвишләр бистәсендә картлар йорты ачарга ниятлиләр. Аның директоры Әлфис Әхмәтгалиев булачак. Аның сүзләренчә, әлеге йортны ачуның төп сәбәбе - җәмгыятьнең эчү белән чирләве. «Бездә күпләр башта аракы эчә, аннан беркемгә дә кирәкләре калмагач, инвалидка әйләнә. Бөтен әйберләрен сатып эчеп бетергәч аларны социаль оешмаларга урнаштыралар. Күп очракта балалары йорт-җирләрен, мөлкәтләрен алып әти-әниләрен куып чыгара һәм картлар йортларына җибәрә», - ди Әлфис әфәнде.

Дөрес, әле Казанда моңа кадәр картлар йорты юк иде. Күп очракта караучысыз калганнарны һәм балалары баш тараканнарны кайбер районнарда булган картлар йортларына урнаштырдылар.

Казандагы картлар йорты 120 кешегә исәпләнгән булачак. Әлегә Әхмәтгалиев бу йортның ни рәвешле эшләве тәгаенләнмәгән, дип белдерә. Ул үзе аның картлар килеп сәламәтлекләрен ныгытып китә торган тернәкләндерү үзәге булуын тели. Шунда ук өлкән яшьтәгеләрне тернәкләндергәндә фәнни-тикшеренү эшләр алып барылса тагын да яхшырак булыр иде, ди.

Татарстан хезмәт, мәшгульлек һәм социаль яклау министрлыгы белдерүенчә, республикада 31 инвалидлар һәм картлары йорты бар. Бүген анда барлыгы 1895 кеше яши, дип хәбәр итә «Азатлык» радиосы сайты.