«Сөембикә варислары» Ялтага китте

2010 елның 9 – 21 июль көннәрендә Кырым Республикасы Ялта шәһәрендә V “Сөембикә варислары” Балалар иҗатының төрки-татар халыкара фестивале уза. Быел әлеге чара Бөек Җиңүнең 65 еллыгына багышлана. Анда Россия, Украина, Казахстан, Үзбәкстан, Литва, Польша һәм башка илләрдән яшь талантлар катнаша. Фестивальне ачу тантанасы 11 июльдә үтте. Йомгаклау гала-концерты исә 20 июльгә планлаштырылган.

Матур традициягә әйләнгән “Сөембикә варислары” фестивале Татарстанның халык артисты, М.Җәлил исемендәге премия лауреаты, Кырым автоном республикасы атказанган сәнгать эшлеклесе Гөлзада Сәфиуллина инициативасы белән үткәрелә.

Фестиваль-бәйге 5 номинация буенча үткәрелә: вокал, бию, инструменталь жанр, нәфис сүз, рәсем. Сайлап алу туры читтән торып үткәрелә. Йомгаклау туры исә Ялтада үтә. Җиңүчеләр Гала-концертта катнаша.

Фестиваль программасында: экскурсияләр, иҗади очрашулар, семинарлар, мастер-класслар, Сабантуй милли бәйрәме, “Татар кызы” һәм “Татар егете” бәйгеләре, “Мин татарча сөйләшәм!” акциясе, спорт-сәламәтләндерү чаралары һ.б.

Фестивальне оештыруда “Сәләт” Яшьләр иҗтимагый фонды, ТР Мәдәният министрлыгы, ТР Яшьләр эшләре, спорт һәм туристлык министрлыгы, Бөтендөнья татар яшьләре форумы, “Кырым-татар халкының Милли Мәҗлесе” (Симферополь шәһәре), Ялта шәһәре мэриясе, “Акчура” мәдәни үзәге (Ялта шәһәре) дә ярдәм итә.