Мәскәүләр Казанны «яуламакчы»

Мәскәү сәяхәтчеләре Татарстанга килергә җыена. Юл мәшәкатьләре инде башланган.

Татарстан белән танышырга теләүчеләр юлга 17 июльдә кузгалачак. Әлеге чараны оештырган «Сәяхәтчеләр Клубы»на йөрүче яшьләр Татарстанның барлык районннарында да булырга хыяллана. Аларның максаты - Татарстан белән якыннанрак танышу, татар тормышының кызыклы якларын ачу, республикадагы матур урыннарны күреп кайту һәм аны башка төбәктә яшәүчеләргә дә җиткерү.

Экспедиция «Татарстан - контрастлар республикасы» дип атала. Ул тугыз көн дәвам итәчәк. Сәяхәтчеләр нәкъ менә республикадагы диннәр, халыклар, мәдәниятләр төрлелеген күрергә, аларның ничек үзара дус яшәве серенә төшенергә тырыша. Моның өчен алар зур шәһәрләрдә дә, кечкенә авылларда да булырга, зур сәнәгать үзәкләрен дә күреп кайтырга тели. Маршрутка барлыгы 23 пункт кертелгән. Алар арасында мөселманнар өчен изге саналган Болгар шәһәр-тыюлыгы да бар. Шулай ук исемлеккә Казан, Чаллы, Алабуга, Кама Аланы, Чистай шәһәрләре, Свияга тыюлыгы, Раифа монастыре да кертелгән.

Моңа кадәр «Сәяхәтчеләр Клубы» Карелия, Псков һәм Калуга өлкәләренә дә шушындый ук сәяхәтләр оештырган булган, дип хәбәр итә «Татарлар» сайты.