«Сөләйман» мәчетендә малайлар өчен җәйге лагерь ачыла

10 июль көнне Казандагы «Сөләйман» мәчете карамагында малайлар өчен җәйге лагерь ачыла. Биредә 20 көн дәвамында катнаш төркемнәр эшләячәк. Араларында күзләре күрмәүче малайлар да бар.

Мәчет каршындагы бу лагерь инде берничә ел эшләп килә. Төрле яшьтәге мәктәп балалары биредә ислам нигезләре буенча башлангыч белем алачак. Алар Коръән укырга, гыйбадәт кылырга өйрәнә, остазлар белән әңгәмәләр кора. Быел лагерьда Казаннан 60 бала ял итәр дип көтелә. Шулай ук алар арасында Левченко бистәсендәге малайлар да булачак.

Укудан тыш малайлар өчен мәдәни-спорт программасы да төзелгән. көн саен иртәнге гимнастика үткәрү, спорт уеннары, походлар, экскурсияләр оештыру да күздә тотыла. «Казан Кремле» музей-тыюлыгында урнашкан Кол Шәриф мәчетендә, музейларда булып кайту күздә тотыла. Елга порты җитәкчелеге исә малайлар өчен Казансу елгасында ике сәгатьлек экскурсия оештырачак. «Кырлай» паркы да балалар өчен бәйрәм оештырырга ниятли.

«Сөләйман» мәчетенең социаль мәсьәләләр бүлеге җитәкчесе Мәликә ханым Гыйльметдинова сүзләренчә, быел балаларын лагерьга бирергә теләүчеләр бик күп булган. «Берничә ел эчендә безнең лагерь әти-әниләр арасында зур ышаныч казанды. Чөнки лагерьда балалар ял итеп кенә калмый, ислам нигезләрен дә өйрәнә. Җәйге каникуллар балаларга тәрбия биреп калу өчен менә дигән вакыт», - дип искәртте Мәликә ханым.