Малайзиядә тарихта беренче тапкыр судья итеп хатын-кыз сайланды

Малайзия шәригать судына судья итеп тарихта беренче тапкыр хатын-кыз сайланды. Хатын-кыз хокукларын яклаучы оешмалар бу вакыйганы ислам суд системасында бик зур алга китеш, дип исәпли.

Беренче хатын-кыз судья дигән исемгә моңарчы Хөкүмәтнең ислам суды департаментында эшләгән Сурая Рамли һәм  Рафида Абдул Разак лаек булды. Аларны эшкә илнең премьер-министры Нәҗип Разак үзе билгеләде. Алга таба Сурая Рамли - Куала-Лампур шәһәрендә, ә Рафида Абдул Разак Патраджайя административ үзәгендәге судта хезмәт куячак. Премьер-министр мондый карарны хатын-кыз хокуклары, гаилә мөнәсәбәтләренә караган суд эшләрендә мөслимәләрнең хокуклары кысылмасын өчен кабул иткән.

Малайзия мөслимәләрне суд карарын кабул иткәндә дискриминация очраклары күзәтелә, дип  бик еш зарлана. Хатын-кызларның хокуклары бигрәк тә аерылышу, мирас бүлешү, күпхатынлылык мәсәләләрен хәл иткәндә бозыла икән. Ирләр еш кына алимент түләүдән кача, аерылышу вакытында милекнең зуррак өлешен үзендә калдырырга тырыша, дип белдерә хатын-кыз хокукларын яклаучы оешмалар. Мондый карар инде әллә кайчан кабул ителергә тиеш иде, ди алар бу уңайдан.

Сүз уңаеннан, Малайзиядә шәригать судлары гаилә, мирас бүлешү, әдәп-әхлак кагыйдәләре белән бәйле эшләрне карый, дип хәбәр итә «Регионы.ру» сайты.