Казан үзенә татар яшьләрен җыя

6-12 июль көннәрендә Казанда XX Татар яшьләре көннәре узачак. Фестивальдә Россиянең 40 төбәгеннән һәм чит илләрдән - Әзәрбәйҗан, Казахстан, Үзбәкстан, Латвия, Кытайдан - 200гә якын татар яшьләре катнашачак. Чараны ТР Яшьләр эшләре, спорт һәм туризм, татарларның федераль милли-мәдәни мохтарияте һәм "Идел" яшьләр үзәге оештыра.

Фестивальдә катнашучылар өчен оештыручылар кызыклы программа әзерләгән. Татар яшьләре көннәре кысаларында татар егет-кызлары татар язучылары, артистлары, төбәк милли-мәдәни мохтариятләр вәкилләре белән очрашачак. Алар өчен шулай ук татар теле, хореография, вокал дәресләре, "түгәрәк өстәл"ләрдә фикер алышулар, экскурсияләр, массакүләм мәгълүмат чаралары вәкилләре белән очрашулар каралган.

Татар яшьләре көннәрен уздыруның максаты - татар яшьләре арасында милли кыйммәтләрне пропагандалау, эшлекле һәм мәдәни элемтәләрне ныгыту, яшьләр сәясәте өлкәсендә мәгълүмат белән алмашу, татар яшьләре оешмалары алдында торган проблемаларны хәл итү юлларын эзләү.

Фестивальдә катнашучылар Петровский бистәсендәге кунакханәдә яшәячәк. 7 июльдә "Ак Барс" яшьләр үзәгендә Татар яшьләре көннәре тантаналы рәвештә ачылачак, дип хәбәр итә "Интертат" агентлыгы.