«Сад» нәшрияты «Сөләйман» мәчетенә китаплар бүләк итте

Дини әдәбият бастыру белән шөгыльләнүче «Сад» нәшрияты «Сөләйман» мәчетенә китаплар бүләк итте. Китаплар барысы да диярлек балалар өчен чыгарылган басмалар. Алар арасында намаз кагыйдәләренә өйрәтүче китаплар, Пәйгамҗәрләр тарихы, ислам тарихы, балалар өчен төрле вакыйгалар тупланган җыентыклар һ.б.лар бар. 46 исемдәге берничә мең китап шушы көннәрдә «Сөләйман» мәчете китапханәсенә китерелде.  

Китапларның бер өлешен девиант холыклы балалар тәрбияләнүче махсус мәктәпкә тапшырылачак. Анда белем алучы тәрбиягә авыр бирелүче балалар да ислам әдәбияты белән таныша алачак. Кечкенә балалар өчен исәпләнгән китапларны исә Казандагы ятимнәр йортларына, приютларга тарату күздә тотыла.

Китаплар шулай ук 10 июльдә «Сөләйман» мәчетендә эшли башлаячак малайлар лагере эшчәнлегендә дә файдаланачак. Төрле конкурслар вакытында алар малайлар өчен бик яхшы бүләк булачак.

«Сад» - Росиядә танылган  иң зур нәшриятларның берсе. Биредә бик күп төрле дини әдәбият басыла. Алар арасында дин гыйлеме, дин тарихы, ислам нигезләре буенча басмалар да, балалар өчен китаплар да бар. Әлеге нәшриятта басылган китапларны мөселманнар аеруча яратып укый. Чөнки алар аңлаешлы тел белән язылган, шул ук вакытта фәнни кыйммәткә дә ия.