«Алтын каләм-2010» йөзүдән кайтты

Кичә «Алтын каләм-Золотое перо-2010» фестиваленең финал өлеше төгәлләнде. Быел фестиваль 15 тапкыр үткәрелде. Оештыручылар сүзләренә караганда, теплоходта фестиваль соңгы тапкыр оештырылган. Алдагы елдан «Алтын каләм» республикакүләм яшь журналистлар мәктәбе буларак эшли башлаячак.

Быелгы фестивальнең финалына 90 яшь журналист үткән иде. Алар махсус жюри тарафыннан зона турларында сайлап алынды. Катнашучыларны сайлап алуның зона этаплары Баулы, Әлмәт, Түбән Кама, Чистай, Яшел Үзән һәм Арчада үтте.

Зона этапларында үз район-шәһәрләрендә иң яхшы дип табылган яшь журналистлар катнашты. Зона этаплары вакытында булачак журналистларга фестиваль хөкемдарлары тарафыннан мастер-класслар да күрсәтелде. Мастер-класслар татар һәм рус матбугаты, телевидение, радио һәм фотожурналистика буенча оештырылды.

Фестивальнең финалы 28 июньнән 4 июльгә кадәр «Борис Полевой» теплоходында үтте. Яшь журналистлар «Казан-Самара-Саратов-Волгоград-Казан» маршруты буенча сәяхәт итте. Биредә алар төрле мастер-классларда, очрашуларда катнашты. Катнашучылар алдына көн саен иҗат итү бурычы да куелган иде. Булачак журналистлар рус һәм татар телләрендә «Алтын каләм» газетасын чыгардылар, телевизион һәм радио тапшырулары әзерләде. Алар белән сәяхәткә танылган журналистлар ТР Дәүләт Советы рәисе урынбасары Римма Ратникова, «Татарстан - Яңа гасыр» телеканалының директор урынбасары Миләүшә Айтуганова, танылган диктор, алып баручы Лия Заһидуллина, «Ялкын» журналының баш мөхәррире Эльмира Закирова, КФУның журналистика факультеты деканы урынбасары Роман Баканов, журналистлар Айрат Бик-Булатов, Раилә Сабирова һ.б.лар да барды. Быелгы фестивальнең тагын бер үзенчәлеге - «Борис Полевой» теплоходында элеккеге еллардар «Алтын каләм»нең төп бүләге - Гран-при алучылар да катнашты.

Быелгы Гран-при ияләре исә көчле конкуренция шартларында ачыкланды. Катнашучылар барысы да журналистика өлкәсендә инде шактый тәҗрибә туплаган, мәктәптә үк төрле газета-журналларның хәбәрчеләре булырга өлгергән егетләр-кызлар. Шулай да жюри, озак уйлаганнан соң, төп бүләкне ике яшь журналист егеткә бирергә булды. Татар телендә иҗат итүчеләр арасында Чаллы егете Линар Закиров җиңү яулады, ә рус телендә иҗат итүчеләр арасында - Никита Рузанов.