Гаиләнең нигезе - диндә

30 июньдә «Татмедиа» мәгълүмат агентлыгында 8 июльдә үтәчәк Гаилә көне уңаеннан матбугат конференциясе булды. Конференциядә «Кол Шәриф» мәчете имам-хатыйбы Рамил хәзрәт Юнысов та катнашты. Рамил хәзрәт сүзләренчә, хәзер ата-аналар да, яшьләр үзләре дә гаилә коруга артык җиңел карыйлар. Ислам буенча баланы өйләндергәнче яки кияүгә биргәнче аның нәсел-нәсәбе белән танышу каралган. Хәзер исә кыйммәтле рестораннарда, зур акчалар түгеп туй итүгә күбрәк игътибар бирелә, дип борчылды Рамил хәзрәт. 

Шулай ук хәзрәт «бер-берсен өйрәнү», «бергә яшәп крау» өчен генә никах укытуга да каршы булуын белдерде. Гаилә кору гомердә бер генә булырга тиеш, монда «яшәп карау»лар бөтенләй булмаска тиеш, диде ул журналистларга. «Кайвакыт мәчеткә дә яшерен никах укырга сорап килүче яшьләр була. Әти-әниләренә әйтмичә генә бергә яшәргә теләүчеләрне без кире борабыз. Мондый никахларны Казанда да, Татарстан мәчетләрендә дә укымыйлар», - дип әйтте Рамил хәзрәт.

Матбугат конференциясендә шулай ук гаилә системасын ныгыту турында да сүз булды. Бу уңайдан дин ярдәмгә килергә мөмкин. Чөнки исламда гаиләгә зур игътибар бирелә, аның мөһимлегенә һәрдаим басым ясала. «Исламда аерылышу хупланмый. Аерылышырга теләк белдергән парлар белән сөйләшүләр, аңлату эшләре оештырабыз», - диде Рамил хәзрәт Юнысов.  

Сүз уңаеннан, ТР Министрлар Кабинеты карамагындагы ЗАГС идарәсе башлыгы Эльмира Зарипова соңгы елларда гаилә корырга теләүчеләр саны арта бара. Быелның 5 аенда 8409 никах теркәлгән. Аерылышучылар саны исә, киресенчә, бераз кимегән. Гыйнвардан июньгә кадәр 5700 гаилә таркалган (үткән елдан 7 процентка кимрәк). Тагын бер кызыклы үзенчәлек: хәзер яшьләр гаилә корырга ашыкмый икән. Элегрәк кызлар - уртача 22, егетләр 24 яшьтә гаилә корган. Хәзер исә кызлар - 24, ә егетләр 26 яшьләр тирәсендә, ягъни аякка баскач кына өйләнешергә тырыша.