«Яндекс» татарча да сөйләшә башлады

Татарстан Интернет кулланучылары хәзер «Яндекс» белән татарча «аралаша» алачак. Сайт хәзер татар телендәге сорауларга җавап бирә, аның беренче бите, эзләү интерфейсы һәм «Яндекс.Почта» хезмәте  татар телендә дә эшли.

Статистика буенча федераль хезмәт мәгълүматларына күз салганда, республикадагы 3,7 миллион кешенең 2 миллионы татар телен белә икән. Шуңа да сайт татарчалашырга булган. Кулланучыларга уңайлы булсын өчен сорау биргәндә татар хәрефләрен дә кулланырга була. Сораулар биргәндә татар теленең морфологиясе дә исәпкә алына.

Татарстандагы кулланучылары өчен «Яндекс» төп сервисларны локальләштерә. Мисал өчен, эзләү  вакытында Татарстанда яшәүчеләргә файдалы мәгълүматлар чыгарыла. Бу бигрәк тә ниндидер оешма, кибет яки хезмәт эзләүчеләр өчен файдалы. «Яндекс.Авто»да Татарстандагы машина базарындагы тәкъдимнәр чыгарыла, ә «Яндекс.Маркет»та Казандагы интернет-кибетләр урын алган, ә «Яндекс.Карта»да Татарстан, Казан, Чаллы картасын карарга мөмкин.

«Яндекс» Татарстан эшкуарлары өчен дә яңа мөмкинлекләр булдыра. Җирле сайт хуҗалары «Яндекс»ның әзер технологияләреннән (API, виджет, домен өчен почта) файдалана алачак. Реклама бирүчеләр өчен дә сөенечле хәбәрләр бар: «Яндекс» Казанда коммерция офисы булдырырга ниятли. Ул киләчәктә сайтка реклама бирүчеләрне алга җибүрү белән шөгыльләнәчәк, дип хәбәр итә nnit.ru сайты.