Илнең Парламенты вазифаларын Кыргызстанда Закон чыгару җыены башкарачак. Анда хәзерге Вакытлы хөкүмәт әгъзалары утырыр дип көтелә. Бу турыда бүген Вакытлы хөкүмәт рәисе урынбасары Амурбәк Текебаев хәбәр итте. Әлеге хәбәрне җирле мәгълүмат агентлыгына сылтама белән «Регнум» сайты тапшыра.
Текебаев сүзләренчә, Кыргызстан президенты һәм Хөкүмәт башлыгы вазифаларын әлегә Роза Өтенбаева алып барачак. Чөнки референдумда катнашкан халык аның кандидатурасын калдыру белән килешкән. Яңа төзеләчәк Закон чыгару җыенына исә хәзерге Вакытлы хөкүмәттән кайбер кешеләр сайлап алыначак.
Бик тиздән Кыргызстанда Хөкүмәт формалаштырылачак. Парламент урынына эшләячәк Закон чыгару җыенын исә сайлаудан соң гына оештырып булачак. Шуңа күрә тиз арада әлегә Парламент вазифасын үтәп тору өчен ассамблея яки комитет кебегрәк берәр орган формалаштырып торырга ниятлибез, дип белдерә Текебаев әфәнде.
Парламентка сайлау 10 октябрьдә үтәргә тиеш. Ләкин соңгы арадагы вакыйгалардан соң аның вакытын алгарак күчерүне сорап мөрәҗәгать итүчеләр арта бара, дип хәбәр итә А.Текебаев.