АКШта татар Сабан туе үтте

Нью–Йорк татарлары милли бәйрәмебез Сабан туен 20 июньдә бәйрәм итте. Шәһәрнең Эйзенхауэр исемендәге паркына 300дән артык татар җыелды. Сабан туенда катнашучыларны Татарстанның АКШтагы Вәкиле Равил Нигьмәтҗанов сәламләде. Ул бәйрәм уңаеннан Татарстан Президенты Рөстәм Миңнеханов тәбрикләмәсен ирештерде.

Быелгы Сабан туе бигрәк тә күп яшьләрне җәлеп итте, бәйрәм программасындагы милли уеннарны, татар җыр һәм биюләрен дә алар оештырды. Сәйдә ханым Хаҗи, Рокыя ханым Мансур кебек апалар Алсу Гарифуллинаның бәйрәмне җәһәт кенә алып баруына сокланып карап утырганнан соң, яшьләр инде үзләре дә мөстәкыйль рәвештә мәдәни чаралар үткәрә алуына, Америкада яшәп тә татар милли традицияләрен сакларга омтылуына шатлыкларын белдерде.

Сабан туена Американың башка штатларыннан да татарлар килгән иде. Очрашу барышында  хәзер Америкада яшәүче татарларның гомум җәмгыятен булдыруга ихтыяҗ барлыкка килүе турында да сүз булды. Менә Сабан туе узгач, Алсу Гарифуллина Америкадагы татар җәмгыятьләре белән элемтәгә кереп, шушы тәкъдимне җиткерергә җыена. Ул хуплау тапса, 2011 елның апрелендә оештыру җыенын уздыру планы бар. Татарстанның АКШтагы вәкиле Равил Нигъмәтҗанов Америка татар җәмгыяте белән Казан арасында элемтәләрне ныгытуга ярдәм итәргә әзер булуын әйтте, дип хәбәр итә «Интертат».