Екатеринбургта мөселманча белем бирү мәсьәләләре каралачак

8-9 августта Екатеринбургта «Россия мөселманнары: фән, мәгариф, конституцион хокукларны яклау» дип аталган I Бөтенроссия фәнни-гамәли конференция узачак. Чараны Россиянең Азия өлеше Диния нәзарәте, Новосибирски дәүләт университетының тарих кафедрасы, Урал дәүләт тау университеты, «Мәгариф» Новосибирски өлкәсе мәгариф эшчеләре татар ассоциациясе, «Себер – фән: XXI гасыр» иҗтимагый оешмасы үткәрә. Конференция ислам мәдәнияте, фәне һәм мәгарифенә ярдәмләшү фонды финанс ярдәме белән оештырыла.

IslamRF.Ru хәбәрчесенә оештыру комитеты әгъзасы, Россиянең Азия өлеше Диния нәзарәтенең мәгариф һәм фән комитеты рәисе Илһам Меражов әйтүенчә, әлеге фәнни форумны үткәрнең төп максаты – дини белем бирү, ислам фәне үсешенә ярдәм итү, бу өлкәдә эшләүче белгечләрне бер җирдә туплап, тәҗрибә уртаклашу.

Конференциядә катнашу өчен дин эшлеклеләре, мөселман оешмалары вәкилләре, галимнәр, югары уку йортлары һәм мәктәп укытучылары, студентлар, дәүләт һәм җәмәгать эшлеклеләре чакырыла. Катнашырга теләүчеләргә 20 июльгә кадәр islamkonf@yandex.ru электрон адресына хат җибәрергә кирәк. Хатка доклад тезисларын да өстәп җибәрү мәҗбүри.