Иран Газага гуманитар йөк җибәрмәскә булган

Иран гуманитар йөк төягән корабларын Газага җибәрмәячәк. Бу турыда Решт шәһәрендә үткән матбугат конференциясе вакытында ниятләнгән акцияне оештыручыларның берсе Хөсәен Шәех-әл-Ислам хәбәр итте, дип яза «NEWSru» мәгълүмат агнтлыгы.

Моңа кадәр матбугатта 26 июньдә (кайбер мәгълүматлар буенча - 27 июньдә) Ираннан Газага гуманитар йөк төягән кораблар җибәреләчәк, дип хәбәр ителгән иде. Интернетта: «Ул Газага ике атнадан барып җитәр дип көтелә. «Газа балалары» дип аталган корабка 1100 тонна йөк төялгән. Экипаждан тыш, корабка тагын 10 пассажир алыначак», - дигән хәбәрләр күренде.

Әмма Хөсәен Шәех-әл-Ислам  әфәнде әйтүенчә, кораблар юлга 3 июльдә кузгалырга тиеш булган. Әмма Израиль тарафыннан кертелгән яңа чикләүләр нәтиҗәсендә Иран җитәкчелеге гумантар йөк төялгән корабларны юлга чыгарудан бөтенләй баш тарткан. Шулай да Хөсәен әфәнде Газа халкы өчен тупланган гуманитар йөк ничек булса да оккупацияләнгән территориягә илтеп җиткереләчәк, дип белдерде. Әмма моның ни рәвешле башкарылачагын ачыклап тормады. Матбугат конференциясендә шулай ук Израиль халыкара оешмаларның сүзенә колак салыр һәм Газадагы блокада өзелер, дигән фикер әйтелде.