Кыргызстанда референдум үтте: сайлаучыларның 91%ы яңа конституциягә риза

27 июндә Кыргызстанда илнең яңа конституциясен кабул итү буенча референдум үтте. Референдумга бары тик бер генә сорау чыгарылган иде: «Сез Кыргызстанның яңа конституциясе кабул ителүгә ризамы?» Соңгы нәтиҗәләр буенча, референдумда катнашкан халыкның 91%ы яңа конституцияне яклап чыккан. Бу турыда Кыргызстанның Үзәк сайлау комитеты сайтында хәбәр ителә.

Кабул ителгән яңа конституция проектын Корманбәк Бакиевны җитәкчелектән алып ыргыткан яңа хөкүмәт тәкъдим итә. Аның буенча Кыргызстанда президентның вәкаләтләре шактый киметелә. Ул күбрәк тәкъдим итү функцияләрен генә башкарачак. Нәтиҗәдә, Кыргызстан парламент республикасына әверелергә тиеш.

Бүген иртән алынган мәгълүматлар буенча 2 318 сайлау участогының 2 189ы буенча бюллетеньнәр инде эшкәртелгән. Алар буенча сайлауга килгән халыкның 90,84%ы яңа конституцияне кабул итү яклы, ә 7,84%ы - каршы. Үзәк сайлау комиссиясе референдумның соңгы нәтиҗәләре 5 июльдә билгеле булачак, дип белдерде.

Апрельдә булган хакимият алмашынудан соң җитәкчелеккә Роза Өтенбаева җитәкчелегендәге оппозиция партиясе килде. Роза Өтенбаева "күчеш чорының" президенты итеп билгеләнгән иде.