Сомалида футбол карау тыела

Сомалида  футбол буенча Дөнья чемпионатының исламга килешмәвен алга сөргән динче төркемнәр, матч караучыларны җәзалый. Шимбә көнне коралланган динче төркемнәр матчны карарга дип җыелган җанатарлар йортына басып керә. Нәтиҗәдә 2 кеше үтерелә, 30 кеше кулга алына.

Сомалида кайбер җирләрдә хакимиятне үз кулында тоткан динче төркемнәр, футбол буенча Дөнья чемпионаты башланыр алдыннан ук футбол яратучыларны кисәтеп куйды: «Футбол карарга ярамый. Караган кеше халык алдында камчы белән кыйналачак. Каршы килгән кешене хәтта зуррак җәза көтә».

Сомалида ике динче төркем бар, «Хизбул Ислам» һәм «Әл Шабаб». Бу төркемнәр үз карамагындагы җирләрн белән шәригать кануннары буенча идарә итә. Әмма алар кайвакыт бик кискен чараларга да бара. Мисал өчен, алар 2006 елда ук футболны «шайтан уены» дип атап, футбол карауны тыйган иде.

Эфиопия көчләре 2007 елда динче режимны бетерергә тырышса да, Сомалида соңгы елларда аларның тәэсире арта гына бара, дип хәбәр итә «Азатлык» радиосы.