Айдар Хәлимнең «Өч аяклы ат»ын Мәскәүдә күрсәтәчәкләр

Шул исемдәге кино Россия халыклары дуслыгы көннәре кысаларында тәкъдим ителә.

2 март көнне Мәскәүнең «Сатурн» кинотеатрында, Россия халыклары дуслыгы көннәре кысаларында, Айдар Хәлимнең «Өч аяклы ат» автобиографик повесте буенча шушы ук исемдә режиссер Нурания Җамалиева тарафыннан төшерелгән нәфис фильмы күрсәтеләчәк. Фильм татар телендә булып, русча субтитрлар белән барачак. Инде еракта калган 1948 ел вакыйгалары хакында сөйли торган әлеге фильм Казан халыкара мөселман киносы фестиваленда «Иң яхшы операторлык эше» номинациясендә җиңү яулаган иде, дип искәртә «Татаркино» дәүләт учреждениесе.

Әлеге чара ТРның РФдәге Вәкаләтле вәкиллеге һәм «Татаркино» дәүләт учреждениесе тарафыннан, Мәскәү шәһәре төбәк татар милли-мәдәни мохтарияте катнашында оештырыла дип хәбәр итә «Татар-информ».