2011 елда дөньядагы 12 кеше акула корбанына әйләнде

Үлем очраклары буенча бу күрсәткеч соңгы 20 елда рекордлы санны тәшкил итә.

АКШның Майами шәһәре (Флорида штаты) тарихы музее галимнәре чыгышыннан күренгәнчә, узган елда дөньяда акулаларның кешеләргә 75 тапкыр һөҗүм итү очрагы теркәлгән. Шуларның 12се үлем белән төгәлләнгән. Бу хакта ИТАР-ТАСС агентлыгы хәбәр иткән.

Австралиядә ерткычлар адәм баласына 11 тапкыр ташланганнар, шуның 3се һәлакәткә китергән. Реюньон (Һинд океаны), Сейшель утрауларында һәм Көньяк Африка Республикасында — 2 шәр, Коста-Рика, Кения. Яңа Каледониядә берәр кеше җан тәслим кылган.

АКШта акулалар 29 мәртәбә кешегә һөҗүм иткән, үлем-китем булмаган. Россиядә ерткычлар 3 кешегә төрле дәрәҗәдә җәрәхәт ясаганнар. Бу очраклар Приморьеда килеп чыккан.

Әлеге тикшеренүнең җитәкчесе ихтиолог Джордж Берджессның сүзләренчә, акулаларның күп кенә һөҗүмнәре үзәктән читтәге төбәкләрдә барлыкка килгән, яралы кешеләргә вакытында медицина ярдәме күрсәтелмәгәнлектән, алар мәңгегә күзләрен йомган.

Галим акулаларга кеше үзе бу ерткычларга караганда күбрәк зыян сала дип исәпли. «Чынлыкта, диңгездә көн күрүчеләр артык заралы түгел. Шулай булмаганда, без кешеләргә аларның меңәрләгән очракларын теркәгән булыр идек»,-дигән тикшерүче.

АКШ галимнәре мәгълүматларына караганда, серфингчыларның 60 %ы ерткычлар корбанына әйләнә икән. 35%ны — суда йөзүчеләр, 5 %ны дайверлар тәшкил итә.

Чыганак: "Татар-информ"