Рөстәм Миңнеханов 20 млрд. сум ана капиталын файдаланырга чакырды

«Хәзер бу акчалар тик ята һәм акча очсызлана. Ә торак бәясе төшми», — дип ассызыклады Татарстан башлыгы.

Татарстанлыларга ана капиталы өчен бүлеп бирелгән 19,8 млрд. сум әлегә файдаланылмаган. Бу акчаларның 60 процентын Казанда яшәүче әниләр алган. Бу хакта ТР Хөкүмәт йортында узган республика киңәшмәсендә Татарстан Президенты Рөстәм Миңнеханов белдерде.

Рөстәм Миңнеханов халыкка ана капиталының файдаланылмаган акчаларын очсызландырмау турында аңлату эшләре алып бару кирәклеген ассызыклады.

«Бүген зур сумма — 20 млрд сумга якын акча халык тарафыннан файдаланылмый. Бу кешеләрне ачыклап, ана капиталын файдалану ысулларына җәлеп итәргә кирәк, — дип ассызыклады ТР Президенты. — Хәзер бу акчалар тик ята һәм акча очсызлана. Ә торак бәясе төшми, бу зур ресурс. Әгәр аларны дөрес файдалансак, күпме торак төзергә була!»

Россия пенсия фондының ТР буенча җитәкчесе Марсель Имамов докладында ана капиталын файдаланмаучыларның күбесе Казанда һәм Лаешта дип белдерелде. Рөстәм Миңнеханов видеоэлемтә буенча Казан мэры Илсур Метшинга Казанда яшәүче әниләргә нинди юллар тәкъдим итәргә мөмкин булуын карау бурычын куйды. «Һәр гаилә белән аерым аралашырга, гражданнарга мөмкинлекләрен аңлату зарур», — дип белдерде ТР башлыгы һәм иң яхшысы бу акчаларны торак шартларын яхшыртуга сарыф итү дип билгеләп үтте.