Мөфти Әлбир хәзрәт Крганов: Өч мәчет һәм палатка Мәскәү өчен үтә д

Мәскәү һәм Россиянең Үзәк төбәге мөфтие Әлбир хәзрәт Крганов Иҗтимагый Палата утырышында Мәскәүдә мөселманнар өчен гыйбадәт кылу урыннарының җитмәү мәсьәләсен күтәрде.

«Әгәр илнең башкаласы Мәскәүдә 170 мең мөселман өч мәчеттә һәм бер палатада урын җитмәүдән асфальтта яңгыр астында гает вакытында намаз укырга мәҗбүр ителгәннәр икән, алар салкында канәгатьлек хисләре кичереп басып торалар, дип уйлыйсызмы әллә?»-дигән мөфти хәзрәтләре «Интерфакс-Религия» сайтыннан алынган хәбәрдә.

Мөфтинең сүзләренә караганда, башкала җитәкчеләре яңа мәчетләр төзү уңаеннан биргән вәгъдәләрен үтәми.

«Без, рәсми дин әһелләре, мөселманнарны сәясәткә кысылмаска, коткыларга бирелмәскә, чит кулларда уенчык булмаска чакырабыз. Тик түрәләр безне Хуҗа Насретдин хәлендә калдыра, безгә җир кишәрлекләре бирергә, мәчет төзелешендә булышырга ышандыралар. Әмма бу эшләрнең берсенә дә булышмыйлар. Моны мөселманнарга ничек аңлатырга?»-дигән сорау куйган ул.

Бу уңайдан мөфти хәзрәтләре Мадридта һәм бу шәһәр янында 300 мәчетнең, гыйбадәт кылу урыннарының булуын искә төшергән. «Ә Мәскәүдә берничә миллион мөселман яшәсә дә, алар нибары 3 мәчеттә кысылып намаз укырга мәҗбүр»,-дигән Әлбир хәзрәт Крганов.