Казанда Яңа ел алды авыл хуҗалыгы ярминкәләре уза

Башкала базаралрына 28,9 миллион сумлык ит, бал, казылык эшләнмәләре һәм башка тауарлар китерелгән

«Татар-информ»нан алынган мәгълүматларга караганда, бүген Казан базарларында Яңа ел алды авыл хуҗалыгы ярминкәләре уза. Барлыгы 28,9 миллион сумлык ит, бал, казылык эшләнмәләре һәм башка тауарлар китерелгән, продукция алып килүдә 454 машина җәлеп ителгән. Бу хакта «Татар-информ» агентлыгына ТР Авыл хуҗалыгы һәм азык-төлек министрлыгыннан хәбәр иттеләр.

Казан базарларына 96,2 тонна бәрәңге, 77,7 тонна яшелчә, 67,5 тонна май, 48 тонна сөт, 256,8 мең сумлык сөт продукциясе китерелгән. Моннан тыш, казанлыларга казылык эшләнмәләре, сыр, ысланган ризыклар һәм башка төрле ит деликатеслары, бизәлеше ягыннан торттан һич тә кайтыш булмаган яңа ел пироглары тәкъдим ителә.

Шулай ук традицион яңа ел казлары да сатып алырга мөмкин — түшкәләрне сайлау мөмкинлеге гаять зур.