Уфада Башкортстанның беренче ислам банкы ачылды

Уфада «Восток-Капитал» офисының «Эллипс» (Түбән Новгород) банкы ачылуы Башкортстан тормышында тарихи вакыйга булды, дип саный республиканың банк берләшмәсе, хөкүмәт, нәзарәт вәкилләре һәм оешманың клиентлары, дип хәбәр итә «ProUfu.Ru».

Хәзер мөселманнар финанс мәсьәләләрен Шәригать кысаларыннан чыкмыйча хәл итә алачак, ди Үзәк Диния нәзарәте рәисенең беренче урынбасары Васил хәзрәт.

Мондый банк булу өлкәгә дини кануннар нигезендә эшләгән чит ил инвесторларын җәлеп итәчәк, дип саный Милли банк рәисе урынбасары Марат Кашапов. Ул җөмһүрияттә мондый идеянең алдан ук булганын хәбәр итте. «Әлеге төр банксыз базар икътисады тулы була алмый, чөнки Шәригать кысаларындагы хезмәткә ихтыяҗ бар», — ди М. Кашапов.

Офис белән идарә итүче Алмаз Абдуллин сүзләренчә, ай дәвамында тест режмында эшләү мондый хезмәткә ихтыяҗ зур икәнлеген дәлилләде. Банкның клиентлары булып физик һәм юридик затлар мөрәҗәгать итте. «Аурупада ислам банкларын төрле диндә булучылар файдалана. Алар өчен акча эшләү һәм китерү тыелган юллардан булмавы мөһим», — ди ул.

Шулай да, ислам финансына бүген кызыксыну югары булса да, мондый финанс институтлары төзегәндә проблемалар белән очрашырга туры килә, ди «102banka.ru».

Нигездә, бүгенге көндә Россиянең законнар системасы моңа әзер түгел, норматив база юк. Моның хакта банк ачылу тантанасында Башкортстан республикасы кредит оешмалары Ассоциациясе башкарма директоры Әсхәт Хөснетдинов әйтте. Икенче проблеманы ул халыкның ислам финанслау асылын аңламаганнан күрә.