Хатын-кызлардан беренче казый Мөхлисә Бубига багышланган “Үлеп яратты” спектакле премьерасы – 9, 10 һәм 27 декабрьд|

Сталин репрессияләре корбаны булган, төрмәдә атып үтерелгән Мөхлисә Буби ролендә — Нәҗибә Ихсанова һәм Дания Нуруллина

«Татар-информ»нан алынган мәгълүматларга караганда, Галиәсгар Камал исемендәге Татар дәүләт академия театры яңа 106 нчы сезонында Ркаил Зәйдулланың татар кызлары өчен беренче мәдрәсә оештыручы, күренекле җәмәгать эшлеклесе, хатын-кызлардан беренче казый Мөхлисә Бубига багышланган «Үлеп яратты» дип исемләнгән пьесасын сәхнәләштерде. Премьераның режиссеры — яшь талант иясе Илгиз Зәйниев. Премьераны 9, 10 һәм 27 декабрь көннәрендә күреп булачак.

Сталин репрессияләре корбаны булган, төрмәдә атып үтерелгән Мөхлисә Буби ролендә — Нәҗибә Ихсанова һәм Дания Нуруллина.

Ркаил Зәйдулланың бу әсәре «2010 елның яңа татар пьесасы» конкурсында ТР Мәдәният министрлыгының махсус премиясенә лаек булган иде.

Ркаил Зәйдулла ни өчен Мөхлисә Буби язмышына мөрәҗәгать иткән соң? Театрның 106 нчы сезоны ачылуга багышланган матбугат очрашуында бу сорауга җавап биреп, ул әлеге темага мөрәҗәгать итүнең сәбәбе бүген мәгариф өлкәсендәге вәзгыятькә бәйле булуын әйтте.

Ул тарихта нык эз калдырган Мөхлисә Бубиның абыйлары белән берлектә татар халкы тормышында зур эз калдырганлыгын, алар оештырган Иж Бубый мәдрәсәсендә безнең генә түгел, башка милләт балалары да белем алуын билгеләп үтте. Мәдрәсәнең программасының бигрәк тә гуманитар юнәлештә бүгенге югары уку йортлары программасыннан аерылмавын белдерде.

Ркаил Зәйдулла Мөхлисә Бубиның гомеренең соңгы көннәрен төрмәдә уздыруын, анда вакытта беркемне дә сатмавын һәм иманлы килеш үлеп киткәнлеген әйтте. Мөхлисә Бубиның татар хатын-кызларына үрнәк булырлык шәхес булуын белдерде.

Спектакльнең режиссеры Илгиз Зәйни сүзләренчә, әлеге спектакль — иманлы кешенең көче турында. «Бу тема безнең драматургия өчен әле яңа. Ул тамашачылар өчен кызыклы булыр дип уйлыйбыз», — диде режиссер.