"Рубин» Ирландиянең «Шэмрок Роверс» командасын тар-мар итте

Казанлылар көндәшләре капкасына дүрт туп кертүгә иреште.

30 ноябрьдә «Рубин» үз кырында «Шэмрок Роверс» командасын 4:1 исәбенә тар-мар итте. Әлеге матч алдыннан «Рубин» Лондонның «Тоттенхэм» клубы белән бергә үз төркемендә икенче һәм өченче урыннарны бүлешә, ә казанлыларның көндәше — 17 тапкыр Ирландия чемпионы соңгы баскычны били иде. Грециянең ПАОК клубы исә беренче баскычта урнашты.

Корбан Бердыев матчның беренче минутларында ук кырга Рыжиков, Калешин, Навас, Шаронов, Боккетти, Натхо, Нобоа, Рязанцев, Карадениз, Нельсон Вальдес һәм Обафеми Мартинс кебек уенчыларны чыгарды. Казанлылар 10 нчы минутта исәпне ачуга иреште.

Әмма кыр хуҗаларының шатлыгы озакка бармады. Ике минут узуга ук «Шэмрок Роверс» исәпне тигезләде. Алга чыгу өчен «Рубин»га 24 минут кирәк булды. Бибрас Натхо керткән туп нәтиҗәсендә казанлылар исәпне 2:1 итте.

Икенче тайм башында кунаклар "дилбегә"не үз кулларына алган кебек булды. Әмма 5 минут узуга ук өстенлек казанлылар кулына күчте. Бу юлы Вальдес уңышка иреште. 62 нче минутта Мартинс керткән туп уенның язмышын хәл итте. Нәтиҗәдә, очрашу «Рубин» файдасына 4:1 исәбенә төгәлләнде.

Шул рәвешчә, «Рубин»ның язгы стадиядә Ауропа Лигасында чыгышларын дәвам итү өчен бөтен мөмкинлекләре дә бар.

«Рубин» — «Шэмрок Роверс» (Ирландия) — 4:1 (2:1)

Тупларны керттеләр: Вальдес, 10 (1:0). Оман, 12 (1:1). Натхо, 36 (2:1). Вальдес, 51 (3:1). Мартинс, 62 (4:1).

«Рубин»: Рыжиков, Калешин, Шаронов, Навас, Боккетти, Рязанцев (Дядюн, 71), Натхо, Нобоа, Карадениз (Ансалди, 69), Мартинс, Вальдес (Касаев, 61).

«Шэмрок Роверс»: Томпсон, Салливан, Стивенс, Маррей, Оман, Патерсон (О`Доннел, 70), Райс, Тернер (Твигг, 81), Деннехи, Финн (Килдафф, 70), Шеппард.

Язма "Татар-информ"нан алынды