Уфада хәләл азык-төлек сатуны арттыру хакында сөйләштеләр

Уфаның «Ихлас» мәчетендә «Башкортстан җөмһүриятендә хәләл азык-төлекне тормышка ашыру мәсьәләләре» дигән «түгәрәк өстәл» узды.

Биредә Башкортстан Диния нәзарәтенең «Хәләл» стандарт Комитеты җитәкчесе Тимур Шәнгәрәев, Башкортстан Илбашының дәүләт-конфессияара мөнәсәбәтләр Советы рәисе киңәшчесе Илюс Әхәтов, Башкорстан сәүдә ассоцияциясе рәисе Илдар Гарифуллин, Башкортстанда, Чиләбе, Оренбург, Белгород өлкәләрендә хәләл азык-төлек җитештерү эшләре белән шөгыльләнүче оешмалар җитәкчеләре, республиканың зур сәүдә үзәкләре вәкилләре, мөселман эшлеклеләре, журналистлар катнашты.

Очрашу барышында зур сәүдә үзәкләренә хәләл азык-төлек кертү, башкорт җитештерүчеләрен Рәсәй дәрәҗәсенә чыгару, ММЧларында «хәләл» брендын алга җибәрү, җитештерүчеләр һәм товар белән тәэмин итеп торучылар арасында үзара хезмәттәшлекне ныгыту, «хәләл» тамгасы сертификаты турында сүз барды.

«Түгәрәк өстәл» кысаларында «Ufa Halal 2011» төбәгара үткән бәйгенең җиңүчеләрен билгеләделәр һәм хәләл азык-төлекне татып карадылар.

Чара Башкортстан Диния нәзарәтенең «Хәләл» стандарт Комитеты, җөмһүриятнең сәүдә һәм кулланучылар хокукларын яклау комитеты, авыл хуҗалыгы Министрлыгы, Сәүдә-сәнәгать палатасы, Башкортстан Илбашының дәүләт-конфессияара мөнәсәбәтләр Советы тарафыннан оештырылган иде.