Самара өлкәсендә кечкенә Кол Шәриф төзеләчәк

24 ноябрь көнне Самара өлкәсендәге Сызрань шәһәренең Үзәк мәчете янында Җәмигъ мәчете нигезенең беренче ташы салыначак. «Әлеге проект — Казан Кол Шәриф мәчетенең кечкенә күчерелмәсе булачак. Төзелештә өлешчә ярдәмне ислам мәдәниятына, фәненә, белем бирүенә булышу Фонды, калган ярдәмне килүчеләр һәм хәйриячеләр күрсәтә, дип хәбәр итә IslamNews хәбәрчесе Наҗия Ернеева.

Яңа мәчет төзелүнең сәбәпләре нидә, дигән сорауга, әңгәмәдәшебез: «Шәһәрдә мөселманнарның саны көннән-көн арта баруында", - дип җавап кайтарды. "Үзәк мәчет бәйрәм вакытларында барысын да үзенә сыйдыра алмый. Менә бу Корбан бәйрәмендә генә 600ләп мөселман гаеткә килде. Ә бина эченә аларның ни бары 500е сыйды, калганнар намаз укуны урамда башкарды. Мөселманнарга намаз уку залында гына түгел, ә мәчетнең бар булган буш урыннарына урнашырга туры килде. Гыйбадәтханә бик кечкенә, шуңа да килүчеләр ишегалдында, урамнарда басып калды», — ди ул.

Мөселманнарны котларга шәһәр идарәсе башлыгы Виктор Хлыстов килгән иде. Бәйрәмгә мәчет тулысынча торгызылды. Ернеева сүзләренчә, биредә евротәрәзәләр куелган, җылыту системасы алыштырылган, тулысынча ремонт ясалган.

Сүз уңаеннан, Сызраньда бүгенге көнгә 4 мәчет эшли.