Самарада татар балалар бакчасы ачылды

Самарада «Батыр» исемле татар балалар бакчасы эшли башлады. Әлеге бакчада балалар милли, дини гореф-гадәтләр нигезендә тәрбия ала.

Самараның үзендә 43 ел дәвамында «Ялкынлы яшьлек» исемле җыр, бию, шигърият ансамбле эшли. «Бердәмлек», «Азан», «Ислам — Нур» исемле газетлар чыгып килә.

«Яктылык» мәктәбендә 436 бала белем ала. Самараның үзендә татар тормышын яктырткан биш сайт бар. Ниһаять, саф татар балалар бакчасы эшли башлады. Аның исеме дә - «Батыр».

Бакчаның өстенлеге шунда ки, ул - шәхси хуҗалык. «Батыр»ның мөдире — Нотфулла кызы Әлфия Хәлиуллова.

Балалар бакчасы илле нарасыйга исәпләнгән. Биредә аларны дүрт мәртәбә тик хәләл ризыклар белән генә тукландыралар.

Тәрбия татар гореф-гадәтләренә нигезләнгән. Тәрбия, туклану динебез ислам кушканча башкарыла.

Бакча иртәнге җидедән кичке җидегә кадәр эшли. Балаларга татар җырларын һәм биюләрен өйрәтәләр. Ашап-эчкәч, балалар дога кыла.

«Туган тел» исемле Самара өлкә татар җәмгыяте «Батыр»ны татар китаплары белән тәэмин итә. Ата-аналар аена 10 000 сум акча түли.

"Азатлык орг."тан алынды.