Сара Садыйкова исемендәге “Калфаклы сандугач-2011” VI Төбәкара ачык фестиваль-конкурс була

Шул рәвешле, Г.Кариев исемендәге Казан татар яшь тамашачы театры яңа буын талантлар җыя

«Татар-информ»нан алынган мәгълүматларга караганда, бүген 16.00 сәгатьтә Г.Кариев исемендәге Казан татар яшь тамашачы театрында (Гладилов ур., 49) татар җыры һәм инструменталь музыка буенча мәшһүр композитор Сара Садыйкова исемендәге «Калфаклы сандугач-2011» дип аталган VI Төбәкара ачык фестиваль-конкурс башлана.

Быел фестиваль С.Садыйкованың тууына 105 ел тулуга багышлап, 7-10, 11-14 һәм 15-17 яшьлекләр арасында төркемләп үткәрелә. «Калфаклы сандугач-2011»дә Казан һәм Татарстан районнары, Чувашия Республикасы, Ульяновск өлкәсе һәм Мәскәү каласыннан 6 дистәләп музыкант һәм җырчы катнаша. Җиңүчеләр исә 3 номинация буенча сайлап алына: солистлар (вокал, инструментта башкаручы), вокаль ансамбльләр (дуэт, трио һ.б.), инструменталь ансамбльләр (дуэтлар, триолар; квартетлар, квинтетлар, катнаш). Башкаланың Киров һәм Мәскәү районнары хакимияте дә үзеннән бүләк әзерли. Яшьләрнең сәләтен Казан консерваториясе профессорлары Зилә Сөнгатуллина, Земфира Сәйдәшева, Марат Әхмәтов, КФУның Филология һәм сәнгать институты доценты Миңгол Галиев, шагыйрь һәм әдәби тәнкыйтьче Ренат Харисов, баянчы Кирам Сатиев — җыр һәм музыка сәнгате дөньясында танылган дистәләп шәхес бәяли.

Сара Садыйкова исемендәге «Калфаклы сандугач-2011» VI Төбәкара ачык фестиваль-конкурсны Казанның Киров районындагы 4 нче татар гимназиясе оештырган. Нигез салынганнан бирле, гимназия 24 нче балалар музыка мәктәбе белән хезмәттәшлектә тора, яшь талантлар үстерә: гимназия балаларының яртысыннан артыгы шунда музыкаль белем ала. Укытучылар ул мәктәп балаларын, Сара Садыйкова музыкасында үскән буын ул, дип атый.