Казанда 14-18 ноябрь көннәрендә Студентлар бердәмлеге атналыгы узачак

Атналык кысаларында лиганың Ачык президиумы оештырылып, Студентлар лигасының 15 еллык эшчәнлегенә нәтиҗәләр ясалыр һәм киләчәккә стратегик үсеш планнары билгеләнер дип көтелә

Казанда 14-18 ноябрь көннәрендә Студентлар бердәмлеге атналыгы узачак. Ул ТР Студентлар лигасының 15 еллыгына багышлана. Бу хакта бүген ТР Министрлар Кабинетында узган матбугат очрашуында хәбәр ителде.

Атналык кысаларында лиганың Ачык президиумы оештырылып, Студентлар лигасының 15 еллык эшчәнлегенә нәтиҗәләр ясалыр һәм киләчәккә стратегик үсеш планнары билгеләнер дип көтелә. Әлеге чарада президиум әгъзалары, партнер оешмаларның, министрлык-ведомстволарның җитәкчеләре, лиганың лидерлары — Марат Бариев, Андрей Кондратьев, Игорь Савельев, Ариф Межведилов, Виктория Черкесова һәм башкалар катнашыр дип көтелә.

Шулай ук Республика яшьләр форумы кысаларында Идел буе федераль округының студентлар үзидарәсе лидерлары форумы узачак. Җыен барышында Идел буе федераль округы студентлары конгрессына әзерлек турында фикерләшү көтелә.

Студентлар бердәмлеге атналыгы вакытында ТР Студентлар лигасы турында җырлар конкурсы һәм «Объектив лига» фотоконкурсына йомгак ясалачак.

Шулай ук лиганың 2011 елдагы эшчәнлегенә дә нәтиҗә чыгарылачак. Быел Студентлар лигасы Универсиада авылында яшәүгә дәгъва итүчеләр арасында бәйге, актив студентлар арасында транспортта бушлай йөрү мөмкинлеге бирә грантлар бәйгесе, Н.Лобачевский исемендәге премия алу өчен, фәнни эшләр бәйгесен һәм башка чараларны уздырган, дип хәбәр итә "Татар-информ".