РИУ студенты шәһәр ярышларында турникта күтәрелү буенча беренчелеккә чыкты

13 октябрьдә Россия Ислам университетында мөселман яшьләре арасында турникта күтәрелү буенча ярышлар үтте.

Бәйгедә 12 кеше катнашты. Бирегә «Мәрҗани», «Әниләр», «Солтан», «Әҗем», «Фәрхәт», «Рамазан», «Кабан арты» мәчетләреннән катнашучылар, Казан Ислам көллиятеннән, Россия Ислам университетыннан студентлар килгән иде. Ярышлар барышында әйдәманнар билгеләнде. Алар арасында илаһият факультетының 1 курс студенты Артур Сабиров - 35, Казан Ислам көллиятенең 3 курс шәкерте Гомәр Гамадаев - 26 һәм «Мәрҗани» мәчетеннән килгән Фирзәр Җәләлов 23 тапкыр турникта күтәрелде. Алар, билгеле, 1, 2, 3 нче урыннарны яулады.

Җиңүчеләргә дипломнар, медальләр һәм истәлекле бүләкләр бирелде.

Ярышның оештыручысы булып Татарстан Диния нәзарәте тора. Ә бәйгенең максаты: мөселман яшьләре арасында физик культураны һәм спортны популярлаштыру, сәламәт яшәү рәвеше мәсләген җәелдерү, дип хәбәр итә РИУның матбугат үзәге.