5 октябрь - Халыкара Укытучылар көне

1994 елдан бирле йөздән артык илдә, 5 октябрь укытучылар көне, дип билгеләп үтелә. Бу бәйрәм белем бирү өлкәсендә эшләүче һәркем өчен мөһим. Әлеге бәйрәмнең гамәлгә керүенә, 1966 елның 5 октябрендә Парижда «Укытучыларның җәмгыятьтә биләгән урыны» — дигән җыен үтүе сәбәпче булып тора. Нәтиҗәдә ЮНЕСКО вәкилләре һәм Халыкара хезмәт оешмасы тарафыннан «Укытучы статусына кагылышлы тәкъдим»гә кул куела.

Рәсәй 1994 елдан бирле бу бәйрәмне 5 октябрь билгеләп уза, ә аңа хәтле ул айның беренче ял көненә туры китереп үткәрелә иде. Бу йола Әзербайҗан, Белорусия, Казахстан, Кыргызстан, Латвия Украинада әле һаман да сакланып калган.

Укытучының хезмәте бик тә авыр. Шуңа да соңгы елларда кадрларга кытлык кичерелә. Моңа бу хезмәттә рухи һәм физик яктан талчыгу, уңайлы эш шартлары булдырылмаган булу, штатта кыскартулар күзәтелү сәбәп булып тора.

Ни генә булмасын, укытучы ул мәртәбәле һөнәр. Чөнки яшь зурлыгына карамастан, һәр кеше күңелендә беренче укытучысы, яраткан фәненең серләренә төшендерүчесе тирән эзләр калдырган һәм күпме генә гомер үтсә дә, мәктәп еллары хатирәләрен яңартучы истәлек булып хезмәт итә.

Шул форсаттан файдаланып, кадерле укытучыларыбызны авыр һәм мактаулы хезмәтләре белән тәбрик итәбез! Аларга, ныклы сәламәтлек, сабырлык, гаилә бәхете, күңел тынычлыгы һәм хәерле озын гомер телибез.