Мөселман киносы фестивален Равил Гайнетдин ачып җибәрәчәк

6-11 сентябрьдә Казанда узачак халыкара мөселман киносы фестивален елдагыча кинофорумның президенты, Россия мөфтиләре советы рәисе Равил Гайнетдин ачып җибәрәчәк.

Равил Гайнетдин үзенең сәламләү сүзендә: »Мөселман киносы фестивале: ислам дөньясы тормышында мөһим вакыйгаларның берсе. Бөтен дөньяда фестивальгә карата булган зур кызыксыну гуманизм пробелмаларына, халыкларның рухи-әхлакый мәдәниятына кызыксынуның үсүе турында сөйли. Мөселман киносы фестиваленең нәкъ менә Казанда — көнчыгыш һәм көнбатыш мәдәниятлар кисешкән, төрле милләтләр һәм диннәргә нисбәтле халыклар дустанә яшәгән урында үткәрелүе бик күркәм. Татар халкына хас булган мәдәни һәм әхлакый кыйммәтләрнең ел саен уздырыла торган фестивальнең концепциясендә һәм идеясендә чагылыш табуы үрнәк алырлык. Дога кылып, фестивальгә озын гомер, чәчәк атуын һәм уңышлар телим », — дип яза.

Мөселман киносы фестиваленә 8 көн калып бара. «Бөтен әзерлек эшләре тәмамланды. Бары тик күңелле мәшәкатьләр генә калды», — дип хәбәр иттеләр оештыру комитетында. Фестиваль тантаналы рәвештә 7 сентябрьдә «Пирамида» күңел ачу үзәгендә ачылыр дип көтелә.