Кадер кичәсендә фәрештәләр җиргә төшә

26 августтан 27 сенә каршы төндә — Кадер кичәсе. Татарстан мөфтие Илдус хәзрәт журналистлар катнашында узган ифтар ашында бу кичә турында болай диде: «Мөмкин булганчыга кадәр догалар кылып, Аллаһка мөрәҗәгать итәргә кирәк. Ураза тоттыкмы, юкмы, намаз укыдыкмы, юкмы, күңелдә Аллаһы Тәгаләгә карата ниндидер бер мөнәсәбәт булсын һәм шушы көндә аңар ялварып теләкләр телик. 26 сынан 27 сенә каршы төндә дәррәү кубып мөселманнар дога кылалар. Ул вакытта фәрештәләр бу дөньяга төшеп йөриләр дип вәгъдә ителә».

Кадер кичәсе рамазанның 26 нчы кичендә бәйрәм ителә. Мөхәммәд Пәйгамбәргә (с.г.в.) Коръән аятләре Аллаһы Тәгаләдән шушы кичәдә иңдерелә башлаган. Кадер кичендә тәүбә кылган бәндәнең барлык гонаһларын Аллаһы тәгалә ярлыкар. Бу кичәдә кылынган изге гамәлләрнең савабы башка вакытка караганда күп тапкырга артык. Гадәттә мөселманнар бу төнне йокламый үткәрәләр, мәчетләрдә намаз укыйлар, дога кылалар, дип яза Интертат.ру.

Кадер кичәсенең Рамазан аеның төгәл кайсы кичәсендә булганын Аллаһ кына белә. Бер хәдистә аны рамазан аеның соңгы ун көне арасыннан эзләргә кирәклек хакында әйтелә. Пәйгамбәр (с.г.в.): «Кадер киче 27 нче яки 29 нчы кичтер. Бу кичәдә фәрештәләрнең саны җирдә булган вак ташлардан да күбрәк булыр», — дип әйткән.