Чиләбе өлкәсе татарлар конгрессы «Татар кызы» дигән зур масштаблы проектны тормышка ашыра

Милләтне, телне саклауда, үстерүдә татар хатын-кызының, әниләрнең роле зур икәнлеге һәркемгә мәгълүм. Соңгы елларда инсафлы чын татар хатын-кызларын тәрбияләү мәсьәләсе бөтенләй игътибардан төшеп калды дип әйтү хата булмас.

Бу максатны күзаллап, Чиләбе өлкәсе татарлар конгрессы «Татар кызы» дигән зур масштаблы проектны тормышка ашырырга уйлаган. Проект үз эченә матурлык, гүзәллек, тапкырлык, уңганлык конкурсларын гына түгел, тагын да тирәнрәк критерийларны алган. Милли гореф-гадәтләребезне китаптан укып кына түгел, ә тормышта да кулланып күрсәтә белергә тиеш ярышта катнашучылар.

Беренче этапта катнашучы ике йөзләп кыз бала жюри әгъзалары алдында үзләренең туган телдә сөйләшә, җырлый, татарча бии белү сәләтләрен күрсәткәннәр, милли тәм-томнар әзерләү буенча ярышканнар. 200 кеше арасыннан 29ы ярымфиналга үткән, дип яза «Татар-Информ».

Бүгенге көндә һәр чәршәмбедә өлкә телевидениесе каналында телевизор караучылар ярымфиналга узучыларның маҗараларын карый, алар өчен җан ата. Ә маҗаралар җитәрлек! Шәһәрдә туып үскән кыз балаларның чишмәдән көянтә-чиләк белән су ташуын, токмачлы аш пешереп өлгертү өчен тавык йолкуын, бәрәңге чүбен утавын тагын кайда күреп булыр иде!

Тамаша-конкурсның финал өлеше октябрьдә булачак. Оештыручылар катнашучыларга зур сюрприз әзерләгәннәр — финалда беренче урынны алучы иң гүзәл, иң тапкыр, иң уңган татар кызы автомобильгә лаек булачак.