Свердловски өлкәсе мәчетләренә имамнар җитми

Соңгы елларда өлкәбездә мәчетләр төзелеше акрын гына темплар белән булса да алга бара. Рәсми булмаган мәгълүматларга караганда, Урта Урал төбәгендә 40 тан артык мәчет, 40 ка якын мәхәллә эшләп килә. Гомүмән алганда, барысы сиксәнләп дин йорты дигән сүз бу.

Әмма бер хәл күңелне борчый: халыкка туры юл күрсәтерлек укымышлы, белемле имамнар җитешми. Бу проблема өлкәбезнең кайбер шәһәрләрендә, мәсәлән, Богданович, Буланаш кебек җирләрдә бүгенге көндә актуаль, дип яза «Татар-Информ».

Күп кенә төбәкләрдә мәчетләрне милләттәшләребез җиткерә, алар биредә яшәүче төп мөселман халыклары өчен төзелә, шуңа күрә дә рухи җитәкче-имам читтән килгән кеше түгел, ә халкыбызның борынгыдан килгән гореф-гадәтләрен яхшы белүче, үз мохитебездә үскән, гыйлемле, булдыклы, акыллы, сүзе үтә торган татар кешесе булырга тиеш, дип саныйлар мәхәллә җитәкчеләре.