Татарстан туган телдә укытучы мәктәпләр саны буенча Россиядә икенче урынны били

Бу санны «Российская газета» га Мәгарифне үстерү буенча федераль институтның милли белем бирү проблемалары үзәге җитәкчесе Ольга Артеменко китергән.

Артеменко биргән мәгълүматка караганда, Россиядә уку-укыту процессын туган телдә алып баручы мәктәпләр саны артканнан-арта. Әгәр дә 1990 елларда алар 13% булса, хәзер исә — 45% ны тәшкил итә икән.

Татарстан туган телдә укытучы мәктәпләр саны буенча Россиядә икенче урынны били. Бездә барлык мәктәпләрнең 53% ы балаларга татар телендә белем бирсә, Тыва республикасында исә мәктәпләрнең 80% ы тувин телендә укыта.

Конкрет милләт вәкилләренең туган телләрен белү-белмәү буенча китерелгән саннар тагын да шаккаттыра. Артеменко сүзләренә караганда, татарларның 95,5% татарча бик яхшы беләләр. Ә 2002 елгы Бөтенроссия халык санын алу нәтиҗәләренә күз салсак, 5 миллион 554 мең 600 татарның 4 миллион 488 мең 330 ы, ягъни 80 % ы үз телләрендә әйбәт сөйләшкән. Әгәр дә Ольга Артеменко узган елгы халык санын алу нәтиҗәләре буенча яңа мәгълүмат китергән дип уйласак, димәк 8 ел эчендә татарларның 15% ы татарча әйбәт итеп сөйләшә башлаган, дип хәбәр итә татар эшлекле газетасы Tatar.ru.