Рамазан аена әзерлек эшләре

2011 елның 19 июлендә ТҖ МДНндә президиум утырышы булып үтте. Утырышта Рамазан шәриф аена әзерлек эшләре һәм Диния нәзарәтенең башка көнүзәк мәсьәләләре каралды. Мөфти Илдус хәзрәтнең кереш сүзеннән соң, Казыйлар шурасы һәм Голәмәләр шурасы тарафыннан тәкъдим ителгән Рамазан аена кагылышлы түбәндәге мәсьәләләр белән таныштылар, алар исә үз чиратында президиум әгъзалары тарафыннан расланылды:

Беренче тәравих намаз 31 июльдә укыла, барлык республика мәчетләрендә тәравих намазын 20 рәкәгать укырга тиешлеген билгеләргә;

Сәхәр тәмамлану вакыты билгеләнделде — кояш чыгарга ике сәгать кала сәхәрне тәмамлыйбыз;

Зәкят нисабы — 116.200 сум, шуның 1/40 (2,5%) өлеше зәкятне тәшкил итә;

Фитр сәдакасының бәясен билгеләргә, быел аның минималь күләме 50 сум (ашлык бөртеге бәясеннән чыгып исәпләнә), 100 сум (хөрмә бәясеннән чыгып исәпләнә), 300 сум (йөзем бәясеннән чыгып исәпләнә) тәшкил итә;

Сәламәтлеге яки өлкән яше аркасында ураза тота алмаган кешеләргә Фидия сәдакасы һәр ураза көне өчен 100 сумнан исәпләнә;

Рамазан аена намаз вакытларын расларга.