Казанда узачак халыкара мөселман киносы фестиваленең кинотасмаларны сайлап алу комиссиясе рәисе итеп Сергей Кудрявцев билгелән

6-11 сентябрьдә Казанда узачак VII Казан халыкара мөселман киносы фестиваленең кинотасмаларны сайлап алу комиссиясе рәисе итеп Сергей Кудрявцев билгеләнде. Россиядәге танылган кино белгече, кинокритик 20 июльдә беренче тапкыр Казанга киләчәк.

Сайлап алу комиссиясенә шулай ук режиссер, драматург, язучы Салават Юзеев, кинофестивальнең программалар директоры Илшат Латыйпов, фестивальнең иҗтимагый элемтәләр буенча директоры Мурад Секакмия, Италия режиссер Ингрид Демец керде.

Сайлап алу комиссиясе үз эшен 20 июльдә башлар дип көтелә.

Казан кинофестивале оештыру комитетына 40 илдән 300 заявка кергән. Алар арасында Төркия, Иран, Мисыр, Согуд Гарәбстаны, Сирия, Бөекбритания, Италия, Мексика, Греция, Һиндстан, Испания, АКШ, Россия, Казахстан, Үзбәкстан һәм башкалар бар. Күпчелек ленталар — Иран, Төркия, Россия һәм Үзбәкстаннан.

Казан кинофестиваленең программалар директоры Илшат Латыйпов сүзләренә караганда, конкурска кырыкка якын фильм (барлык заявкаларның 15 проценты) кертелә.

Конкурс программасына кермәгән, ләкин тамашачы өчен кызыклы фильмнар фестивальнең «Азия киңлеге», «Татарстанда эшләнгән» дип аталган конкурстан тыш тематик блокларында күрсәтеләчәк. И.Латыйпов сүзләренә караганда, профессиональ дәрәҗәдә эшләнгән яңа үзбәк киносына аерым программа багышлана, дип хәбәр итә «Татаркино» матбугат хезмәте.