Һәлакәт нәтиҗәсендә зыян күрүчеләргә ярдәм итүчеләр арта бара

«Корстон» ҖЧҖ «Булгария» һәлакәтендә зыян күрүчеләр фондына 1 миллион сум күчергән. Һәлакәт нәтиҗәсендә зыян күрүчеләргә ярдәм итү инициативасы белән гендиректор Рәис Мөбәрәкҗанов чыккан, аны предприятие коллективы хуплап алган.

Рәис Мөбәрәкҗанов «Татар-информ» агентлыгына хәбәр итүенчә, Идел өстендәге фаҗига турында белгәч, «Корстон» коллективы битараф кала алмаган һәм «Булгария» һәлакәтендә зыян күрүчеләр фондына 1 миллион сум акча күчергән.

Моннан тыш, «Корстон» коллективы «Булгария» теплоходында һәлак булучыларның туганнары кайгысын уртаклаша, дип билгеләп үтте Р.Мөбәрәкҗанов.

Актаныш муниципаль районы советының актлар залында район башлыгы Энгель Фәттәхов эшкуарлар белән күреште. Көн кадагында эшкуарларның «Лизинг-гарант-2011» программасында катнашу мәсьәләсе каралды, дип хәбәр ителә ТР муниципаль районнары порталында.

Программаның быелгы бюджеты 500 миллион сум тирәсе. Әлеге сумманың 30 проценты авыл хуҗалыгына, 30 проценты торак-коммуналь хуҗалык өлкәсенә бүлеп бирелә. Субсидияләр күләме лизинг килешүендәге сумманың 45 процентын тәшкил итә.

Район башлыгы Энгель Фәттәхов икътисад бүлеге белгечләренә заявкалар бирүне һәм вакытында тапшыруны оештырырга кушты.