Бүген «Корстон» кунакханә-сәүдә-күңел ачу комплексында хаҗ буенча III Халыкара конференция башлана.

Бүген «Корстон» кунакханә-сәүдә-күңел ачу комплексында хаҗ буенча III Халыкара конференция башлана.

«Хаҗ — мөселманнар бердәмлеге. Үткәннәр һәм бүгенгесе. Комплекслы якын килү» темасына ике көн рәттән барачак конференциянең бүген алдагы ике пленар утырышында Төркия¸ Катар, Иран, Тунис, Индонезия, Әзербайҗан, Казахстан, Кыргызстан, Украина һәм Беларусь кебек чит илләр министрлыклары һәм хаҗ буенча департаментлары вәкилләре доклад белән чыга. Соңгы утырышта исә Россия мөфтиләре һәм хаҗ-операторлар сүз ала. Алар арасында Мөселманнарның Үзәк диния нәзарәте, Россия Мөфтиләр советы, шулай ук Татарстан, Чечня, Ингушетия Республикалары мөселманнары Диния нәзарәтләре, Дагыстан Республикасы Милли сәясәт, дин эшләре һәм тышкы элемтәләр буенча министрлыгы, Төньяк Кавказ мөселманнары координацион үзәге, Ислам мәдәниятенә, фәне һәм мәгарифенә ярдәм фонды вәкилләре бар, дип хәбәр итә tatar-inform.ru

Иртәгә «түгәрәк өстәл» утырышлары үткәреләчәк. Аларда хаҗга озату алдыннан әзерлек эшләре, дәүләт органнары, Хаҗ буенча советлар, мөселманнарның Диния нәзарәтләре, хаҗ-операторларның роле турында сүз барачак. Шулай ук хаҗ кылу вакытында халыкка ярдәм итү мәсьәләләре дә кузгатылачак.

Әлеге III Халыкара конференция «Идел Хаҗ» төбәкара хаҗ үзәге инициативасы белән уздырыла, хаҗ оештыруны һәм үткәрүнең сыйфатын яхшыртуны, шушы эшләр барышының төрле этабында килеп чыккан проблемаларны комплекслы хәл итүне максат итә.