Төркиядә беренче тапкыр берьюлы күп төрле татар халык аш-сулары танытылды

Төркия дәүләт телерадио корылышы «TRT AVAZ (ТРТ АВАЗ)» каналы «ТУКАЙ» мәдәният һәм мәгърифәт үзәге турында махсус тапшыру әзерләде. «Төрек госманлы ширбәте» дип аталган программа 29 июнь көнне эфирдан тәкъдим ителде. 2 июльдә исә кабатлап күрсәтелде, дип хәбәр итә tatar-inform.ru

Тапшыруда башлыча «ТУКАЙ» мәдәният һәм мәъгрифәт үзәгенең эшчәнлеге, татар халкының гореф-гадәтләре турында сүз барды. Шул исәптән, татар әдәбияты һәм аның җәүһәре Г.Тукай хакында мәгълүмат бирелде. Рушания Алтай шагыйрьнең — «Милли моңнар», татар кызлары Сөмәйрә Кайнак белән Таңсылу Алтай «Ата белән бала» һәм «Туган авыл» шигырьләрен сөйләп күрсәттеләр. Кюршат Алтай аккордеонда татарча көйләр уйнады. Шулай ук Казан ханбикәсе — Сөембикә язмышы белән таныштырып, Сөембикә ханым белән бергә «Сөембикә бәете» җырын башкарды. Әлбәттә, тапшыруда «Туган тел» дә яңгырамый калмады. Алып баручы Әкрам Тамәр аны: «Татар халкының милли гимны» — дип тәкъдим итте. Төркиядә туып-үскән кырым татары Айбала Пулат тапшыруга «Аерылмагыз» җыры белән катнашты. Программада татар халык аш-сулары да танытылды. Шунысын белгертеп узу кирәк: бу көнгә чаклы Төркия телевидение каналларында берьюлы күп төрле татар ризыклары танытылмаган иде әле.

Әнкарада туып-үскән милләттәшебез Алия Быекка ана ватаны-Татарстанны кайтып күрү насыйп булмаса да, ул, 90 яшенә җитеп, татар җырларын онытмаган, тапшыруда үзе белгән такмакларны әйтеп күрсәтте. Бала вакытта Ататөрекне күрү хәтирәсе белән уртаклашты.

Җыр-биюләр белән үрелеп барган тапшыру 35 минут дәвам итте.

Киләчәктә бу тапшыру TRTнең башка телевидение каналларында да күрсәтеләчәк.