Сабантуйлар башланып китә

Татар халкы милли бәйрәмнәрен- Сабантуйлар башланып китүне зур түземсезлек белән көтә. Аңа әзерлек эшләре күптәннән бара инде.

Казахстанда Сабантуй берничә шәһәрдә уздырыла. Аны, иң беренчеләрдән булып, 5 июнь көнне Актүбә шәһәре башлап җибәрәчәк. Сәмәйдә Сабантуй — 11 июнь, Усть-Каменогорскида — 12 июнь көнне үткәрелә. Алмата шәһәре халкы Сабантуйны 19 июнь көнне бәйрәм итәчәк.

Интертат.ру хәбәр иткәнчә, канаданың Торонто шәһәре татарлары өчен Сабантуй уздыру күптән инде матур гадәткә әверелде. «Берлек» татарлар җәмгыяте тарафыннан уздырылучы бу бәйрәм быел 12 июнь көнне G.Ross Lord паркында үткәреләчәк. Кунакларны мавыктыргыч, кызыклы программа көтә. Алар төрле уеннарда катнашып, төрле театральләштерелгән тамашалар карап, җырлап-биеп күңел ачачаклар. Алай гына да түгел, бәйрәм кунаклары тәмле милли татар ризыкларыннан да авыз итә алачак.

Американың Нью-Йорк шәһәрендә Сабантуй 19 июнь көнне Eisenhower паркында узачак. Бу Сабантуйның үзенчәлеге — биредә җыр-бию, милли уеннардан тыш бәйрәм табыны да оештырыла. Тәмле ризыкларны һәр кеше үзе алып килә. Мондый җыенны «Әтиләр көне «пикнигы» («Father's day Picnic») дип тә йөртәләр.