Наркотикларга каршы көрәшне тагын да көчәйтү күздә тотыла

Татарстан мөфтие Россиядә беренче тапкыр наркотик матдәләрне куллануны, җитештерүне, таратуны, керем кертүне тыйган фәтва чыгарды. Алга таба Татарстан имамнары кварталга бер тапкыр җомга вәгазьләрендә наркотикларны куллану һәм таратуның гөнаһлары турында сәйләячәкләр. Гомумән, дин әһелләре замана чиренә каршы тору, наркотикларга бәйлелеккә төшкәннәргә ярдәм итү максатыннан шактый эшләр башкарырга җыеналар. Бу хакта ТР Диния нәзарәте һәм РФ Татарстан буенча наркотиклар әйләнешенә күзәтчелек федераль идарәсе арасында төзелгән килешүдә ачык күрсәтелгән, дип яза интертат.ру

23 майда Диния нәзарәтендә мөфтий Илдус хәзрәт Фәиз һәм генерал — майор Фаяз Шабаев әлеге килешүгә кул куйдылар.

ТР Диния нәзарәте һәм Татарстан буенча наркотиклар әйләнешенә күзәтчелек федераль идарәсе арасында төзелгән килешү кысаларында наркотикларга каршы көрәшне тагын да көчәйтү күздә тотыла. Мөселман оешмалары вәкилләрен профилактика уздыру өчен махсус әзерләү, мәчетләр каршында тернәкләндерү үзәкләрен арттыру, наркотикларга каршы көрәшүче органнар белән уртак чаралар уздыру һәм башка гамәлләр кылу көтелә, дип хәбәр итә Диния нәзарәте.

Наркотикка бәйлелеккә төшкәннәр өчен дингә ышану еш кына бердән-бер котылу чарасына әверелә. Дини җәмгыятьләрнең, тернәкләндерү үзәкләренең каты авыруларны терелтүдә үзенчәлекле тәҗрибәләре бар. Алар 85 процентка кадәр уңай нәтиҗә күрсәтәләр. Моңа ирешү авыру кешене динне тануга, аңар ышануга этәрүдән килә, рухи яктан яңадан туу белән бәйле.