Самара өлкәсенең «Туган тел» татар җәмгыяте үзенең исәп-хисап җыенын уздырды

Менә 22 ел инде Самара өлкәсе татар җәмгыяте милләттәшләребез тормышында күренекле урын алып тора. «Туган тел» җәмгыяте шул ук исемдә Тольятти, Сызрань шәһәрләрендә, Похвистнево районында татар оешмаларын булдырды. Бер ел элек Яңа Куйбышев шәһәрендә дә «Туган тел» җәмгыяте эшли башлады.

Самара өлкәсе татар җәмгыятендә еллык исәп-хисап җыелышы узды. Җәмгыятьнең яңа җитәкчесе итеп, техник фәннәр кандидаты, Татарстанның һәм Русиянең атказанган мәдәният хезмәткәре Илгиз Кәлүч сайланды.

Соңгы айларда татар тормышында бераз җанлану да сизелә. Милли хәрәкәткә төрле катлам вәкилләре килергә тора. Байлар җыелышып, үзләренең берлеген булдырды. Максатлары — татар телендә радиотапшырулар ачып җибәрү.

«Азан» газеты үзенең 15 еллыгын бәйрәм итә. Гомәр углы Ильяс Шәкүров өлкә Сабан туенда баш батырга җиңел машина вәгъдә итә. Самара өлкәсе татар мохтарияте рәисе Мидхәт углы Минәхмәт Хәлиуллов татар егетләрен-кызларын спорт мәйданнарына алып барып, төрле ярышлар уздыра, дип яза Азатлык.орг

«Атлаган саен җырчы, адым саен биюче. Көчле ирләр тәрбияләүчеләр генә аз», -диде М. Хәлиуллов.

Эшкуарыбыз төзелеш фирмасын җитәкли. Мул тормыш алып баручы ир уртасы. «Иртән капкадан өчебез өч машинада эшкә чыгып китәбез, төнлә генә кайтып керәбез», -ди Минәхмәт әфәнде үз гаиләсе турында.

Шәһәр Думасында депутат буларак, җаваплылыкны аеруча тоеп, татар милләтпәрвәре буларак, татар егетләрендә физик һәм рухи көч тәрбияләүдә малын да, вакытын да кызганмый ул. Хәлиуллов офисында кичләрен татар авазлары яңгырап тора. Көндезләрен ир-атлар дөнья куа.