«Балаларның ышаныч телефоннары» проекты

ТР Министрлар Кабинетында узган матбугат очрашуында Татарстан Республикасында Бала хокуклары буенча вәкил Гүзәл Удачина «Балаларның ышаныч телефоннары» проектын үстерү турында сөйләде. Билгеле булганча, әлеге проект балаларны һәм яшүсмерләрне , аларның гаиләләрен социаль яктан яклауга юнәлтелгән.

Гузель Удачина билгеләп үткәнчә, бүген Халыкара балаларның ышаныч телефоннары көне билгеләп үтелә. Бөтен дөньяда мондый телефоннар хезмәтләре челтәре бик популяр. Балаларның ышаныч телефоннарында махсус өйрәтелгән психологлар эшли. Балаларга һәм яшүсмерләргә психологик ярдәм бушлай һәм аноним рәвештә күрсәтелә.

Бүгенге көндә Россиядә 280 ышаныч телефоны эшли. Көн саен бу телефоннар буенча 500 мең бала мөрәҗәгать итә. Россия ышаныч телефоннарының халыкара берләшмәсенә вәкил буларак кергән. 2010 елда Россиядә 8-800-2000-122 номеры буенча Бердәм ышаныч телефоны эшли башлады. Татарстанда бу телефонга тоташтырылган биш ышаныч телефоны буенча шалтыратырга мөмкин.

Гүзәл Удачина сүзләренчә, балалар һәм яшүсмерләрнең шалтыратулары күбесенчә яшьтәшләре һәм ата-аналары белән мөнәсәбәтләргә, гаиләдә көч куллануга кагылышлы.

Матбугат очрашуы вакытында ТР Яшьләр эшләре, спорт һәм туризм министрлыгының өстәмә белем бирү һәм социаль программалар бүлеге башлыгы Миләүшә Галиева сүзләренчә, 2010 елда ышаныч телефоннарына 49 мең шалтырату килгән. Мондый телефоннар Яр Чаллыда һәм Түбән Камада тәүлек буе эшли, дип яза tatar-inform.ru