Бүген Камал театрында Татарстан мөфтие сайланды

Бүген Татарстан мөселманнарының бишенче корылтае узды. Бу юлы чираттан тыш үткәрелә торган җыен мөфти сайлау максатыннан җыелды һәм ул Камал театрында узды. Татарстанның мөфтие итеп Илдус хәзрәт Фәизов сайланды, ул 527 тавыш җыйды. Шулай ук анда яңа мөфтинең беренче урынбасары итеп РИУның шәригать факультеты деканы Габдулла хәзрәт Әдгәмов сайланды, Татарстанның баш казые булып, элеккеге Җәлил хәзрәт Фазлыев калды. Татарстан мөселманнарына кагылышлы мәсьәләләргә дә игътибар булды, Уставка төзәтмәләр һәм өстәмәләр кертелде, гербның кыяфәте дә бераз үзгәрәчәк икәнлеге ачыкланды.

Корылтайда Татарстан Президенты Рөстәм Миңнеханов, Премьер-министр Илдар Халиков, Үзәк Диния нәзарәте рәисе, мөфти Тәлгат хәзрәт Таҗетдин, Россия Мөфтиләр Шурасы рәисе Равил хәзрәт Гайнетдин һәм башка күп сандагы рәсми затлар катнашты, 500 дән артык дин эшлеклесе һәм 150ләп кунак булды.

ТР Президенты дин әһелләрен, кунакларны сәламләп: «Без диннәр һәм милләтләр арасындагы ныклы элемтәләр белән горурланабыз. Бу — Татарстандагы тынычлыкның билгесе. Хәзрәтләребез мөселманарны берләштерә, татулыкны ныгыта. Киләчәктә дә халык күңеленә бердәмлек, татулык орлыклары сеңдерерсез дип ышанам. Мөселманнарның беренче корылтае узганнан соң бердәм дини нәзарәт оешты. Халкыбызның мирасына нигезләнеп күп кенә игелекле эшләр башкарылды. Бу эшчәнлек ата-бабаларыбыздан килгән Әбү — Хәнифә мәзһәбенә нигезләнә. Бу юлда без бердәм», — диде. Корылтайның мөселманнар өчен мөһимлеген ассызыклады. Татарстанда диннең алга таба үсеше бүгенге карарларга бәйле булуы хакында әйтте.