Ирек Даутов: Мәчеттән тынычланып китәм

Рамазан аеның 15 нче көнендә, ягъни 25 августта Казанның “Сөләйман” мәчетендәге ифтар-авыз ачу мәҗлесенә 200гә якын кеше җыелган иде. Аны элек Мәскәү районы

БӘЙЛЕ
2010 Авг 27

Рамазан аеның 15 нче көнендә, ягъни 25 августта Казанның “Сөләйман” мәчетендәге ифтар-авыз ачу мәҗлесенә 200гә якын кеше җыелган иде. Аны элек Мәскәү районы хакимияте башлыгының беренче урынбасары булып эшләгән Ирек Фәрит улы Даутов оештырды.

Бу күркәм гореф-гадәткә моннан 7 ел элек нигез салынган иде. Ул чагында бу районның хакимиятен Гүзәлия Тәлгат кызы Минкина җитәкләде. Шунысы куанычлы: бу җитәкчеләрнең икесе дә әлеге ифтарда катнашты. Ә Гүзәлия Тәлгат кызы: “Рәхмәт, мине онытмаганыгыз өчен”, - дип әйтеп, авыз ачу мәҗлесеннән канәгать калуын белдерде.

Ифтарга халык депутатлары Фәрит Мифтахов, Ислам Әхмәтҗанов һәм төрле дәрәҗәдәге җитәкчеләр килгән иде.

Башта халык мәчетнең фарыз залында Баш казый Җәлил хәзрәт Фазлыевның уразага, дингә багышланган вәгазен тын да алмыйча тыңлады. “Әле без үскәндә генә 4 метрга 5 метр булган өйгә әти-әни, әби-бабай, 6-7 бала, 4 бәти, 1 бозау, ике оя каз сыя иде. Хәзерге 40-50 квадрат метрлы өйгә әби-бабайга да, хәтта бәбигә дә урын юк. Без хәзер бала тәрбияләргә дә иренәбез”, - дип билгеләп узды Баш казый. Ә бу исә нәфесебезне дөрес тәрбияли алмаганыбызны күрсәтә.

Рамазан аеның бөтен кыйммәте дә шунда: ул нәфесне дөрес юнәлештә тәрбияләргә булыша. “Бигрәк тә уразаның беренче 3 көнендә нәфес безне җиңмәкче була, чөнки тәнебезнең иркәләнәсе килә. Бу вакытта баш та авыртып куя, тамак та ача, эчәсе дә килгән күк. Аның бөтен хикмәте дә шунда: ашыйсы да, эчәсе дә килмәсә, ураза булмый ул”, - дип дәвам итте Җәлил хәзрәт. Аннары ул Аллаһның Коръәндәге сүзләрен дәлил итеп китерде. “Әй, иман китергән бәндәләр, Рамазан аена керсәгез, ураза тотыгыз”. Димәк, иманы булмаганнар өчен ураза фарыз түгел. Җәлил хәзрәтнең сөйләвенчә, уразада иң җиңеле – ашау-эчүдән тыелу. Ә иң авыры – телебезне төрле яла ягулардан, гайбәттән саклау.

Пәйгамбәребез заманында шундый хәл булган. Беркөнне Мөхәммәд Мостафа (с.г.в.) сәхабәләргә: “Менә карагыз бу кешегә. Ул – җәннәт әһеле”, - диде. Сәхабәләр теге кешене берничә көн карап, күзәтеп йөрделәр, әмма аның үзләреннән бер генә артык гамәлен дә тапмадылар. Киресенчә, ул әле нәфел намазларын да укымый, нәфел уразаларын да тотмый иде. Пәйгамбәрдән: “Әй, рәсүлуллаһ, бу кешенең бездән бер генә артык җире дә юк. Ничек ул җәннәт әһеле була ала?” – дип сорадылар. Пәйгамбәребез исә: “Аның үз гомерендә бер кешедән көнләшкәне дә, берәү турында да начар сүз әйткәне юк.

Менә шуңа күрә ул иң беренчеләрдән булып җәннәткә керәчәк”,- дип җавап бирә. Аннары Пәйгамбәребез: “Сезнең телегез борыныгыздан сөйрәп тәмугка кертүче”, - дип тә өстәде. Җәлил хәзрәт Рамазан аенда фитыр сәдакасыннан тыш, ураза тота алмаучыларга фидияне бирергә кирәклеге турында да сөйләде. Ә бу төр сәдаканы ( көненә 150 сум исәбеннән) күңелеңнән ураза тоткандагы кебек ният белән бирү зарури икән. Уразадагы тагын бер мөһим гамәл ул – авыз ачтыру. Пәйгамбәребез бу хакта әйткәч, сәхабәләрнең кайберләре уфтандылар. “Йә рәсүлуллаһ, ул савапны ничек алыйк? Өебездә бер тәгам ризык та юк бит”, - дип сорадылар алар. Пәйгамбәребез исә: “Әгәр дә өегездә ризык юк икән, ураза тотучыга авыз ачканда бер йотым су тәкъдим итеп булса да, бу савапны алыгыз”, - диде. Әйе, гадәти вакытта яхшы бер эш өчен 10 савап язылса, Рамазан аендагы изгелеккә 700 савап бирелә. Менә ни өчен Рамазанда күбрәк яхшы гамәлләр кылырга кирәк!

Үзәк төбәкнең һәм Казанның казые Рөстәм хәзрәт Зиннуров исә “Сөләйман” мәчетендә күп кенә игелекле эшләр башкарылуы турында бәян итте. Ул җәйге лагерь вакытында улларының биредә тәрбияләнүе өчен Илдар хәзрәт Баязитовка һәм мәчетнең башка әһелләренә үзенең рәхмәтен белдерде. Аннары Рөстәм хәзрәт бер кыйссаны сөйләп алды.

Бер кешенең үз гомерендә сәдака биргәне булмаган. Менә ул төнлә урамга чыккан да беренче очраган кешегә сәдака биргән. Икенче көнне бөтен халык аннан көлә икән, чөнки ул акчаны белмичә бай кешенең кулына тоттырган икән. Икенче көнне дә ул кеше төнлә урамга чыгып, берәүгә сәдака биргән. Бу көнне ул белмичә акчаны каракка биргән. Ә өченче көнне исә аның акчалары фахишәнең кулына эләккән. Шулай да бу кешенең изгелеген Раббыбыз кабул кылган. Ник дигәндә, бай кеше үзеннән ярлырак бәндәнең сәдака биргәнен күреп, аның үрнәгенә иярергә кирәк дигән карарга килгән, ул да сәдакалар бирә башлаган. Ә карак белән фахишә исә үзләренең ипиен дөрес юл белән эшләп табарга керешкән.

Бик гыйбрәтле кыйсса бу!

Бу көнне “Сөләйман” мәчетенә җыелган мөселманнар бергәләп ифтар мәҗлесендә катнашып, үзара дустанә гәп кордылар, канәгатьләнү хисләре кичерделәр, мондый күркәм ифтарны оештыручыларга рәхмәт сүзләре әйттеләр. Ә аны төп оештыручы Ирек Фәрит улы: “Мин мәчеттән шулхәтле тынычланып, күңелемә ямь алып, өйгә кайтып китәм”, - диде. Ул мондый гамәлне киләчәктә дә дәвам итәргә кирәклеге турында әйтте.

Хатыйп ГӘРӘЙ


avatar
2 Poligraf4903 • 12:59, 2013 Фев 05 [Материал]
у нас на вышеприведенном блоге вы сможете увидеть огромный выбор умных статей про http://ublaze.ru/forum/ftopic1093.html - Как настроить TT-1401 SkyStar3 на телевидение и интернет
avatar
1 Adrian6008 • 20:39, 2013 Фев 02 [Материал]
здесь на официальном интернет-блоге собран большой набор интересных статей про http://medbaz.com/news-more-901.html - воспаление гланд.
Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе