Изге дога ияләре

“Уфадагы мәдрәсәгә укырга китәр алдыннан алар янына кереп, хәер-догагыздан калдырмагыз, дип садака биреп китәм. Аларның укыган догалары кабул була, юлың, эшең уңа”, – ди Рамил. Пенза

БӘЙЛЕ
2010 Авг 12

“Уфадагы мәдрәсәгә укырга китәр алдыннан алар янына кереп, хәер-догагыздан калдырмагыз, дип садака биреп китәм. Аларның укыган догалары кабул була, юлың, эшең уңа”, – ди Рамил. Пенза өлкәсе Кузнецк районы Бистән авылында дөм сукыр Алия һәм Фаилә Яхиналар хакында “Ходай бәндәләре” дигән изге сүзләрне сала халкыннан еш ишетергә туры килде. Авылда зурдан кубып берәр эш эшләргә тотынсалар да, кое казыйбыз, дип ерак сәфәргә чыгып китсәләр дә, бирегә килеп, аларның догаларын алып китмичә юлга чыкмыйлар икән.

Апалы-сеңелле Алия һәм Фаилә яшьтән үк сукыр калганнар. “1953 елда бер күземә операция ясаганнар иде, файдасы булмады”, – ди 90 яшьлек Алия әби. “Ходай шулай кушкан инде. Бер нишләтеп тә булмый”, – дип сүзгә кушыла сең­лесе Фаилә.

Сугыш афәтен, ачлык-ялангачлыкны татыган әлеге ике бертуган бүгенге көннәренә дә шө­керана кылып яши бирә. Биш вакыт намазын, Коръәннән сү­рәләр укыйлар.

– Әни белән әти безгә кечкенәдән үк, кыйнасалар да догаларыгызны, намазларыгызны укыгыз, үкенмәссез , – дип һәрвакыт тәкрарлап тордылар, – ди Фаилә әби. – Заманында әтине Коръән укыганы өчен шактый гына эзәрлек­ләделәр. Әмма ул иманыннан кире кайтмады. Безне дә шул изге юлдан тәрбия­ләде, әлхәмделиллаһ. Догаларның һәммәсен дә тәтәй (әни­ләренең сеңлесен шулай атап йөртәләр) өйрәтте. Ул кычкырып укый, без исә кабатлап барабыз. Иҗекләп ятлатты.

Әлеге изге дога ияләренең язмышлары хакында авыл халкыннан ишеткәч, ястү намазыннан соң бәлки яннарына барып килербез дип юлга чыккан идек. Койрыгыбызга тиз бастылар. Алар төн буе һәм таң атканга кадәр Коръән укыйлар икән. Аллаһы ризалыгы өчен намаз укыйлар, ерак юлга чыгып киткән мосафирларга да дога кылып калалар. “Кайчан гына йокларга өлгерәсез соң сез?” – дип сорыйм әбиләрдән. “Иртәнге намазны укыйбыз да, өйләгә кадәр йоклыйбыз”, – ди Алия әби (сөйләгән арада кеткелдәп көлеп тә ала).

Алия һәм Фаилә Яхиналар­ның үз гаиләләре юк. Аларның икесен дә сеңелләренең улы Ильяс белән киленнәре Наилә карый икән. Үз баласы анасын да карарга авырыксынган бер заманда әлеге яшь гаилә туган апаларын өрмәгән җиргә дә утыртмый. Алия һәм Фаилә әбиләр ишектән Ильясның тавышын ишетүгә үк елап җибәрде: “Менә шул инде ул безнең изге җаныбыз. “Их” дип авыр сулаганнарын да ишет­кәнебез юк. Берәү үз баласын да болай тәрбия­ләми”, – ди Фаилә әби.

”Бүген бит социаль яклау үзәгеннән сәламәтлеге какшаган әби-бабайларны караган өчен хезмәт хакы түләнә. Сез бу хакта мөрәҗәгать иткәнегез бармы соң?” – дим Ильяска. Туганнары кодалый торгач, ул үзәккә барып караган булган икән. Сигез әби карасаң, хезмәт хакыңны түлибез, дип кайтарып җибәргәннәр.

– Ул бит сигез әбине тиешенчә тәрбия кылырга да кирәк. Ашау-эчүләрен кайгыртырга, өйне, кием-салымна­рын чиста тотарга, аларның һәрдаим хәлен белешү дә зарур. Олы яшьтә­геләр җылы сүзгә дә мохтаҗ, – ди Ильяс. – Ниндидер акча алыр өчен эшләнә торган эш түгел бит, Ходай ризалыгы өчен кылына торган гамәл.

Бистән авылындагы олыны – олы, кечене – кече итеп белә торган җирле халыкка исең-акылың китәрлек. Берәр ярдәм кирәк булса, күршесе күршесенә генә булышып калмый­ча, бөтен авыл белән дәррәү кубып кузгала.

Алия һәм Фаилә әби­ләрдән да кеше өзелеп тормый. Алар хәл-әхвәл генә сорашып калмыйча, бирегә намаз укырга да киләләр икән. Без киткәндә, Фаи­лә әби, сабый баладай сөенеп, апалы-сеңелле Рамазан аена әзерләнүләрен ис­кәртеп китте. Сөенеченең сәбәбе шун­да: авылда тәрәвих намазын Алия һәм Фаилә әби белән бергәләп укучылар шулкадәр күп икән. Бирегә килүче һәркем изге дога ияләреннән җанына шифа ала, күңелен сафландырып китә.

"Ватаным Татарстан"


Комментарийны калдырыгыз
avatar

Авг 13
Авг 08
Авг 02
Июл 16
Июл 03
Июн 27
Май 22
Май 18
Май 17
Май 14
Май 14
Май 07
Май 01
Апр 19
Апр 12
Апр 11
Фев 14
Фев 05
Янв 15
Дек 26

40 тартма
Дин
Мәкаләләр


Вакыйга

Май 07

Май 10

Фев 09

Янв 11

Янв 06

Әңгәмәләр
© 2009-2020 "Татар Ислам" мәгълүмат агентлыгы
Сайтка куелган язмаларга барлык хокуклар «Ислам info» медиа-төркеменә карый. Материаллардан файдаланганда гиперсылтама ясау мәҗбүри. Массакүләм мәгълүмат чарасын теркәү турындагы таныклыгы: ИА № ФС-77-45782 13. 07 2011 ел. Элемтә, мәгълүмати технологияләр һәм массакүләм коммуникацияләр өлкәсендә күзәтчелек буенча федераль хезмәт (Роскомнадзор) тарафыннан бирелгән. Урнаштырылган материал 18+. т.8 927 242 35 78
Сайтлар ясау һәм сайт белән идарә итү — «Ариф» студиясе